Shillong, Risaw 17 : U Nongtrei kam paidbah Greneth M Sangma ha ka sngi Palei, ula dawa ia ki bor District ka South Garo Hills ban shim ia ki sienjam ha kaban pynthikna ia ka jingshngain bad jingiada ia ki nongshongshong bad ki nongleit nongwan ha khappud ka India-Bangladesh nalor ban leh eiei pyrshah ia ki Wholesaler kiba donkti ban khaii tuh ia ka shini sha Bangladesh.
Ha ka shithi bala phah sha u Deputy Commissioner ka District, u Greneth ula ong ba ka long kaba donkam ban pynkhlain ia ka jingpahara ha khappud da kaba pynbun ia ka jingdon bad jingtreikam ki shipai Border Security Force (BSF) ha shi lynter ka khappud India-Bangladesh.
“La dawa ruh ban phah iaid pahara man ka sngi ha ki surok khappud ban tehlakam ia ki kam runar, ban pynlong ia ki jingialap bad jingialang bad ki nongshongshnong ha ka ban pynsngewthuh ia ki nongshongshnong halor ki sienjam ba ki dei ban shim na ka bynta ka jingshngain bad ban iatreilang ruh bad ki bor ka Ain” ula ong.
Kane ka jingdawa kala mih haba kdew ia ka jingjia kaba jia ha ka sngi Balang ha Netri ha kaba arngut ki nongleit jingleit da ka thuk thuk, kila shah pakhang lynti bad shah lute ha ki runar na Bangladesh ha ka jaka ba marjan ka Netri BSF Camp. Kine ki runar kiba la rah da ki wait bad tari, kila rong tuh ia ka thuk thuk Pulsar lem bad ki jingdon jingem baroh.
“Kane ka jingjia ka pyni ia ka jingbym shngain jong ki jaka khappud jong ngi bad ka long kaba donkam ban leh eiei ha ka ban ai jingiada ia ki nongshongshnong jong ngi” ula ong.
Nalor kane, u Greneth ula pyntip ruh ba ula ioh khubor ba ki don ki Wholesaler kiba die bad khaii tuh ia ka shini lyngba ka Iew Baghmara, da kaba shim kabu ia ka jinglong jingman ba shong synjor bad ka jingdon jingiadei bad ka Bangladesh.
“Nga kyrpad ba phin leh eiei mardor ban pynsangeh ia kane ka jingkhaii tuh. Lada ki dang bteng, dei ban pynduh noh ia ki licence jong ki” ula ong.
 ha shi lynter ka khappud India-Bangladesh.){kind=link}