Shillong, Naitung 10: U MLA ba marwei ka KHNAM na North Shillong Bah Adelbert Nongrum hynne ka sngi ula dawa ia ka Sorkar Jylla ba kan pynkylla noh ia ka por pynlip bording ha Nongbah Shillong.
“Kala long kyrkieh ban pynkylla noh ia ka por jong ka jingpynlip bording khnang ba ha ka por mynmiet, kan ym pynshlur ia ki riew runar ban shim kabu” ong u Bah Adelbert ha ka kyrwoh.
Une u MLA ula tyrwa ba ha ka jaka ban pynlip bording naduh 1 baje mynstep haduh 5 baje mynstep, ka Sorkar ka dei ban pynlip bording naduh hapdeng ka por 4 baje mynsteo haduh 7 baje mynstep bad 12 baje mynsngi haduh 1 baje janmiet.
U Bah Adelbert ula ong baka dei ka jingsngewkhia ba ka jingpynlip bording ha ka step synnia kala ailad ia ki riew runar ha kylleng ki bynta jong ka Jylla ban shim kabu ia ka jingdum jong ka miet.
“Ka don ka jingiadei hapdeng ka jingpynlip bording ha ka step synnia bad ka jingkiew ki kam bymman hapoh ka Jylla” ula bynrap.
Haba pynpaw ba ka Sorkar ka dei ban pynbeit noh ia ka por bad ban shim ia ki sienjam ban pynduna ia ki kam bymman, une u MLA ula ong “Namar kata, donkam ban sngap ia ka sur u paidbah khlem da pynslem shuh. Ula pynkynmaw ruh ba ka Sorkar ka dei kaba la thaw da u paidbah na ka bynta u paidbah”.
