Guwahati, Iaiong 21: U heh ka Congress uba dei ruh u nongialam liang pyrshah u Debabrata Saikia hynnin ka sngi Palei u la thoh da ka shithi sha ka National Comission for Women (NCW) bad kyrpad ba kin shimkhia mardor ha kaba iadei bad ka jingjia shah kynnoh leh beijot jong kawei ka khynnah 13 snem rta kaba la jia ha ka thain kaba hap hapoh Bardubi police station ha Tinsukia district, Assam.
“Ha ka 20 tarik u bnai Lber ba la dep ka la don ka jingjia hapoh Bardubi Police Station, ha kaba la kynnoh ba uwei u rangbah na ka shnong Katoni u Samendra Rai (58 snem rta) ula leh beijot ia kawei ka khynnah rit kaba dang 13 snem rta kaba dei na kane kajuh ka shnong.Halor kane ka jingjia la rejistar FIR hapoh Bardubi Police Station hapoh ki kyndon Case 39/2023 under Sections 376(3) bad 506 of IPC nalor ki kyndon kiba iadei bad ka POCSO Act. Hynrei, kum ka jingpyntip, ka long kaba sngew bynniaw ba kam shym la don satia kano kano ka jingpynshitom pyrshah ia utei u briew uba la shah kynnoh donkti,” ong u Saikia ha ka shithi sha ka NCW.
“Kum ka jingpyntip ba ka Budoni Praja, ka kmie jong katei ka lanot ka la pynkut noh iala ka jong ka jingim has ka 14 tarik mynta u bnai namar ka jingshah ktah ha ka bor pyrkhat pyrdain kaba mih na katei ka jingjia, bad namar ka jingpulom ha ka liang ki bor pulit ban shim ka jingpynshitom pyrshah ia utei uba shah kynnoh donkti ha kaba leh beijot ia ka khun jong ka,” pynpaw shuh shuh utei u heh ka Congress.
“Ha ka 9 tarik u Lber 2023, u Suku Praja uba dei u dkhot ba la rangbah jong ka longiing u la shah pyniap noh ha ki katto katne ki briew na kajuh ka shnong, hynrei halor kane ka jingjia ruh ym shym la don kano kano ka jingpynshitom da ki bor ba dei khmih.Lah ban kdew hangne ba udei u briew uba la shah kynnoh donkti, u Samendra Rai ia uba la tip bha kum u Somudra Rai u dei uba don ka jingiadei kasba jan bad ka Bharatiya Janata Party (Chairperson, BJP Booth), bad kumta u la lait na ki kti jong ka ain da kaba pyndonkam ia ka bor sain hima, kaba long ka jinglehrain bad kaba dei ban pynrem jur,” ong shuh shuh u Debabrata Saikia ha ka shithi sha ka NCW.
Shuh shuh u Saikia u la ong; “Ha ka por bas ka ophis jong phi ka la shimkhia halor ki jingkynnoh banbor da ka Angkita Dutta, kaba dei ka president ka IYC barim ka Assam, ia kaba Nga la pyrto ia ka jingshim khia ka ophis jong phi, hynrei Ngam lah sngewthuh balei ba kane ka opohis ka NCW ka la pulom ban shimkhia halor katei ka jingjia shah leh beijot bad katei ka jingpynshlur ban pynkut ia la ka jingim ba la leh da uwei u nongialam ka BJP.? Kumta ruh ngi kyrmen ba kane ka ophis kan shimkhia ha kaba iadei bad katei ka jingjia shah leh beijot jong katei ka khynnah 13 snem bad ban ym shah banbor ha ki riewsain hima jong ka party synshar.Kumta ruh la kyntu ban shim mardor ia ki lad jingpynshitom pyrshah ia utei u briew uba shah kynnoh donkti katkum ka ain.”
