Shillong, Iaiong 12: Ka Hynniewtrep Youth Council (HYC) ka la dawa ba dei ban tohkit halor ka jingkynnoh ba ki don ki jingleh byms hok ha ka rukom pyntreikam ia ka Mid-Day Meal Scheme ha ki skul sorkar ha baroh kawei ka jylla.
Ha ka shithi ba la aiti sha u Myntri Rangbah ka jylla Conrad K Sangma ha ka sngi Thohdieng, u Education Secretary ka HYC Enlang Sawian u la ong, “…Nga kyrpad jur ia phi, kum u khliehduh jong ka sorkar jylla ban thaw ia ka komiti tohkit kaba kyrpang ban bishar bniah ia ki jingshisha kiba don sawdong ka jingsam marbam hapoh kane ka skhim, kaba don bynta da ki Managing Committee ki skul bad ki Tnad ba dei khmih”.
“Nalor kata, ka long kaba kongsan ban tynrong ia ka jingkitkhlieh ha kito ki riew shimet kiba pyndonkam bakla ïa ka bor jong ki, ban pynthikna ba ïa ka skhim Mid-Day Meal la pynïaid beit khnang ba ki samla pule kin ïoh ïa ki jingbam ba tei met kiba ki dei hok ban ïoh,” u la bynrap.
Kane ka jingdawa ka dei kaba la pynshong nongrim katkum ka jinglap jong ka Right to Information (RTI) halor ka skhim PM (Poshan), kaba la pynpaw ba ka jingpyntreikam ïa ka skhim Mid Day Meal ha kine ki skul ka long kaba duna bha.
Haba sot ia ki jingshem, u Sawian u la ong ba ki don ki jingbym iahap kiba shyrkhei ha ka jingsam jingbam sngi da ki managing committee bad ki bor pyniaid skul.
“Ki jingshem jong ka RTI ki pyni ba ki jingbam, kiba dei ban pynbiang man ka sngi na ka bynta ki khynnah skul Primary, kim ju pynbiang satia katkum ba la bthah da ki kyndon jong ka skhim,” u la ong bad bynrap “Ki kaiphod na ki khynnah skul, khamtam ha ki jaka nongkyndong, ki pynpaw ba bun ki skul ki ai ïa ka Mid Day Meal tang arsien ha ka shibnai, bad don pat kiba ioh tang shisien ha ka shisnem. Nalor kane, ki don ki khep ha kaba ki skul kim lah satia ban ia ki jingbam sngi, da kaba kdew ia ki jingeh ha ka jingioh pdiang ia ki marbam.”
Nalor kata, ka jubab RTI na ka PM Poshan ka pynpaw ba ïa ka menu ba la pynkhreh da ka NESFAS ym shym la bud ryntih bha, kaba la pynlong ïa ka jingbym don ia ki jait jingbam bapher bapher kiba tei met bad ka jingbha ha ki jingbam ba la pynbiang.
