Guwahati, Jylliew : Ka iingbishar Gauhati High Court ka la kyntu ia ka sorkar jylla ba kan phah tohkit hadien ba ka la pynpaw ia ka jingsngew artatien ka ba jur hadien ba ka la pynsngew ia ka jingkyrpad jong uwei u kontraktor u ba la kyntu ban pynmih hukum ban pyllait ia ka bill ka ba dang sah na ka ba pynpoi ia ki musari (mosquito net) sha ki jaka jong ka BTC.
Na ka liang u Justice Sanjay Kumar Medhi ha ka hukum ka ba u la pynmih u la ong; “kane ka pisa ka don bynta ha kane ka jingjia (case) ka la wanrah ka jingsngew artatien bad pynsuba jur, kata khamtam ruh namar kane ka pisa ka dei ka ba don bynta bad ka pisa u paidbah ba la siew da ki nongsiew khajna.Ka long ruh ka bym lah sngewthuh ban pdiang ba ka jingpynioh ia ki musari ha ki laitylli ki block kan kynjoh shaduh ka T. 31,50,00,000/-.” Ia ka kynhun tohkit yn thaw lyngba ki laingut ki heh sorkar ki ba tbit na ka tnat pla tyngka, kam pohiing ka tnat WPT bad BC ryngkat ka jingiadon bynta lang u principal secretary ka BTC.
“Ka committee ka dei ban trei borbah ban pyndep ia kane ka jingtohkit bad ruh ban phah ia ka kaiphot sha kane ka iingbishar, kata la kumno kumno hapoh ka ar bnai,” ong shuh shuh ka iingbishar. La kdew shai ruh ba ia ki jingtreikam jong katei ka committee yn ym pyrkhing ha ka ba iadei bad kane ka jingjia , hynrei kan khmih ruh halor kiwei pat ki case ha ka ba ka jingdawa na ka bynta ban siew ia ki bill ki ba dang sah halor ki jingtrei ki ba la dep, ki supply ba la phah sha ka BTC ki ba kot ia ka T. 10,00,000 bad shajrong, kumjuh ban pynbiang ia ki jingdonkam jong ka committee ha ka ba iadei bad kane ka jingtohkit.
Ki bor sorkar ka BTC, kata u principal secretary u dei ban hukum ba ia baroh ki ba kum kitei ki jingkam ki ba la kot T. 10,00,000 ne palat dei ban rah sha ka committee ka ban shim ia ki sienjam ki ba donkam, kata tad haduh ba ka committee kan ai ia ka kaiphot. U kontraktor u ba la ai ha ka kyrteng M/S Manaranjan Brahma Enterprise, ha katei ka jingkyrpad u la ong ba baroh ka bill ka ba iadei bad ka jingphah ia ki 4.5 lak ki musari ha ki laitylli ki development block, kata ka Dotoma, Kokrajhar bad Kochugaon ka long T. 31,50,00,000 ha ka ba T.13,00,00,000 la dep ban siew bad ka ba sah ka long sa T.18,50,00,000.
