Guwahati, Jylliew : U Myntri Rangbah (CM) ka Assam, u Himanta Biswa Sarma u la phah da ka jingthoh ban dawa pynshai na u dkhot ka kynhun myntri u Sanjoy Kishan namar ka jingpan map ka jong u na ka kynhun seng lehnoh ba la khein beain ka ULFA (I), kata tang hadien khyndiat por ba u la khot ia une u nongialam jong kane ka kynhun kum u riew shukor.
U Sarma u la phah ia kane ka jingthoh sha u Kishan ha kane ka sngi Saitjain ba la lah, ong ka tyllong khubor heh sorkar u bym kwah pynpaw kyrteng ha ka sngi U Blei kaba bud.
“U Kishan u la hap ban ai ia ka jingpynshai hapoh ka lai sngi hadien ba la ioh pdiang ia ka jingthoh.U CM u la dawa da u Kishan ba un pynshai balei ba u la pan map na ka kynhun ULFA (I),” ong utei u heh sorkar lyngba ka lad pathai khubor.
Ka tyllong khubor ka la ong ba u Kishan u ba mihkhmat na Tinsukia ha ka assembly ka jylla, ha ka 13 tarik u Jymmang ba la dep u la kynthoh ia u heh nongialam ka ULFA (I) u Paresh Barua kum u riew shukor.
Na ka liang katei ka kynhun ha ka sngi ka ba bud ka la pyllait ia ka jingthoh ka ba dawa pan map na une u myntri u ba khmih ia ka tnat Tea Tribes bad Employment namar kane ka jingkynthoh ka jong u da ka ba byrthen ruh ban pynthikna ba kin pynkut noh ia ka jingiatreilang (boycott) bad une u MLA hapoh Dibrugarh bad Tinsukia district ka jylla lada um pan map hapoh ka 24 kynta.Ka ULFA (I) la ong ba ka don katto katne ka jinglah ban banbor ha kine ki artylli ki district ka thain mihngi.
Kumta ruh u Kishan u la pynpaw lyngba ki lad pathai khubor ba um shym la kren ei ei da ka jingthmu ka ban ktah ia u Paresh Barua, bad lada u la kum leh ia kane ha ka jingbymtip, kumta ruh u pan map halor kane ka jingbakla.
Hadien kane, na ka liang ka ULFA(I) ka la pynmih sa kawei pat ka jingthoh ka ba weng noh ia kane ka jingthmu ban boycott pyrshah ia une u nongialam ka BJP.
Ka Seng ULFA(I) ka la pynbna ia ka jingsangeh iasiat bad ka sorkar ha kane ka snem ba la dep, kata khyndiat por hadien ba u Himanta Biswa Sarma u la wan ha ka bor.
