Nongstoiñ, Nailar 9: Ki paid Nongshongshnong ka thaiñ Rambrai kila dawa na ka Sorkar Jylla ba kan kyntiew kyrdan lang noh ia ka Rambrai Primary Health Centre (PHC) sha ka Community Health Centre (CHC) ba kan kham shakri bha ia ki paid nongpang ka thain.
Ki Nongialam Shnong jong ka thain haba iakren bad u nongthoh khubor, kila ong ba kane ka PHC ba mynta kala donkam palat ban hap kyntiew kyrdan noh namar ka dei kaba ai jingsumar ia ki paidbah na kiba bun tylli ki Shnong kiba don marjan.
Kat kum ka jingiathuh jong ki, kane ka PHC kumba long mynta ka dei kaba ai ka jingshakri ia ki nongsongshnong kiba dei naduh ka shnong Mawphansyiar, Rambrai, Mawthir haduh Kyrshai nangta haduh ki thaiñ Synñia, Mawdoh lem bad kiwei kiwei ki shnong kiba jngai bha ki bym pat don satia ki jaka sumar.
Kila ong ba ka jingdawa kyntiew kyrdan ka long ruh ban lah pynbiang ia ki jingdonkam jong kane ka jaka sumar khamtam haba phai sha ki tiar ai jingsumar, ban pynbun ia ki jaka thiah nongpang bad kiwei kiwei.
Kine ki Nongialam Shnong ki iathuh ba san snem mynshuwa, ki Nongialam ka FKJGP-Rambrai Circle kila leit ban jurip ia kane ka jaka sumar bad iakynduh ruh ia u Doktor ba khmih uba la pynpaw ba lada khein ia ka jingdon briew ha baroh ki shnong ka thain kiba hap hapoh ka jingpeit jon gu, kila palat ia ka arphew hajar ngut.
Haba wad jingtip, la shem ba ka Sorkar nadjh ki snem bala leit, kala don jingthmu ban kyntiew kyrdan noh ia ka Rambrai PHC sha ka CHC bad kala ioh ruh ia ka jaka ban shna ia kane ka jaka sumar hynrei kane ka kam kala shu sahkut noh.
