Nongstoiñ, Nailur 9: Ka seng Hynniewtrep Youth Council (HYC) Mawthadraishan Circlem kala dawa ia ka Sorkar Jylla ba kan pynbiang noh ia baroh ki jingdonkam jong ka Pariong PHC kaba la treikam mynta hapdeng shibun ki jingdkoh.
Kane ka Seng kala buh ia kane ka jingdawa hadien ka jingshem ia ki jingduna na ka jinghiar jurip ban peit ia ka jinglong jingman kane ka jaka ai sumar, kaba la ud la nam bha da ki paidbah ba kam lah pynbiang thikna ia ka jingshakri sha ki paid Nongpang.
U President ka seng Bah Shembor Langrin ula pyntip ba ki jingduna kiba don ha kane ka jaka sumar ki kynthup ka jingdon jong ki nongtrei bad ka jingkhein sting kine ki nongtrei ia ka kam.
“Kaba sngewsih ka long ba ki nongpang kiba leit phah sumar ha katei ka jaka, ki la iathuh ba ki don ki por ba ynda la poi ka sngi thohdieng, їa ki nongpang kiba wan phah sumar ha katei ka jaka ym ju pdiang satia bad hap ban kit sha kiwei pat ki jaka sumar” ula kynnoh.
Halor kane, u Shembor u pyntip ba ka seng kala ioh iakren ia u Doktor ba khmih ia kane ka jaka sumar uba la kyntait ban don kum kane ka jingkynnoh hynrei ula pyntip pat ba tang lada la bun palat ki nongpang bad ba ym don jaka thiah shuh, ym banse ban phah ia ki nongpang ban leit sha kiwei pat ki jaka sumar kiba kham kylluid.
Ula iathuh ba une u Doktor ula kubur iaka jingduna ki nongtrei bad ong ba dei na kane ka daw ba ka jaka sumar kam lah ban pynbiang ia ka rukom sumar ia ki nongpang kumba ki dei hok ban ioh.
Ha kajuh ka por, kane ka Seng kala shem ba la donkam ban thung kam noh ia ki nongtrei kiba dei ban trei ha kane ka jaka sumar naduh ki Grade IV, ki Ward Attendance, ban shna ia ki jaka sah ki nos, ki painkhana paidbah bad kiwei kiwei.
