Nongstoiñ, Nailur 14: Ka jingpyntrei ïa ka surok PMGSY kaba 6.2 kilometer na Athiabari shaduh ka shnong Umshiak jong ka khappud Meghalaya Assam, ka dang sahkut haduh mynta naduh ka jingwan pyndik jong ki pulit Assam.
Kumban shu pynkynmaw ba kane ka surok PMGSY ba jrong 6 Km, ka dei kaba la mang haduh T. 554.48 lak, hynrei na ka jingwan pyndik ki pulit Assam, kane ka surok ka la shu sahkut sah haduh mynta ruh.
Halor kane jingsahkut sahteng, ka FKJGP Aradonga Area Unit hapoh ka jingïalam jong u Trellingstar D.Shira President bad u Enbok Marak General Secretary, ki la leit ban ïakynduh markhmat bad u Deputy Commissioner West Khasi Hills, ba un tuklar bad shimkhia khnang ba ka jingpyntrei ïa katei ka surok kan ïaid shait shait khlem kino kino ki jingeh.
Ki la ong ba ha ka jingshisha katei ka surok PMGSY ka dei kaba la sdang pyntrei naduh u Rymphang jong u snem 2018. Hynrei da ka jingpynwit na ka por sha ka por da ki pulit Assam. Kumta haduh mynta ruh ym shym la lah satia ban pyndep.
Ki nongïalam ki la pynpaw ba katei ka surok ba 6 kilometer, ka long ka jingkyrkhu kaba khraw ïa ki paidbah nongshong shnong bad ka long ruh kum u budlum jong ka roi ka par bad kan ïarap ïa ki paidbah ha baroh ki liang.
Ki nongshong shnong ki ban myntoi na katei ka surok Athiabari-Umshiak, ki kynthup ïa kiba shong ba sah ha ka shnong Athiabari, Salpara, Olongop, Ranighat, Malapara, Mazpara, Umshiak bad kiwei kiwei ki shnong ba marjan.
Ki nongïalam ka seng ki la ban jur ba kum u khlieh jong ka District, u dei ban shim ka jingkitkhlieh na ka bynta ka bha ka miat jong ki paidbah ha katei ka thaiñ, da kaba un peit ba kum kine ki kam pynroi na ka bynta ki shnong khappud, dei ban ïaid shaphrang bad ban pyndep beit. Ki la ong ba ki bor sorkar jong ka Meghalaya ki dei ban shimkhia bad tuklar lada dang don kino kino ki bor, kiba pyrshang ban pynthut ha kaba pyntrei ïa katei ka surok.
