Nongpoh, Lber 17: Ki nongshongshnong jong ki artylli ki Shnong ka Ri-Bhoi District ba kynthup ia ka Pahamrioh bad ka Umskun, kila dawa ia ki bor pyniaid District ban leit khang shuwa ia ki artylli ki Restaurant kiba don ha ka thain namar ka jingkynnoh ba ki pyntuid jakhlia sha ki nala shnong, kaba wanrah ia ka jingsahkut ki jakhlia bad pynsma iewtung kaba shyrkhei.
Ki Nongshongshnong jong kine ki artylli ki Shnong hynne ka sngi thohdieng ha ryngkat ka jingsynranlang u Magistrate na ka Ophis u DC, kila leit ban jurup ia ki katto katne ki jaka ba lang ki jakhlia ha ki nala bala kynnoh pyntuid na kine ki Restaurant kiba kynthup ia ka National Highway Dhaba-2 bad ka Sardarji Dhabha.
Haba iakren bad ki nongthoh khubor, u Bah Elianby Tynsong lem bad ki katto katne ki Nongshongshnong ka Pahamrioh bad Umskun, kila pynpaw ia ka jingsngewkhia kaba jur halor ka iwtung kaba mih na ki nala kiba don ha ka surok bah NH-6. Kila kynnoh ba kane ka iwtung kala mih na ka jingsahkut bad jinglang jong ki jakhlia kiba pyntuid na kine ki Restaurant kiba don ha Pahamrioh.
Kine ki rangbah kila pyntip ba ia kane ka jingeh u paidbah la dep ruh ban pyntip bad ujor sha ki bor shnong hynrei la kynnoh ki bor shnong kila sngap jar jar bad khlem eiei. Ki ong ba dei namar kane ka daw ba kum ki Nongshongshnong kila leit ban ujor beit beit sha ka Ophis u Deputy Commission ba kan leh ia kaba donkam.
Kine ki Nongshongshnong kila dawa ia kine ki restaurant ba ki dei ban phah pynkhuid mar mar ia kine ki jakhlia kiba pynsma iwtung ha kane ka nala.
