Shillong, Lber 4: Ka Meghalaya SSA Schools’ Association (MSSASA) ha ka sngi Nyngkong, kala dawa biang ia ka Sorkar ban pynkha ia ki kam bad pynkynriah ia ki 12541 ngut ki Nonghikai SSA na ka State Implementing Society sha ka Tnad Education ka Jylla kat kum ki kyndon jong ka RTE/SSA.
Ka kynhun jong ka Association kala kyntu ruh ia u State Project Director, Samagra Shiksha Swapnil Tembe ba un tuklar lang halor ka jingthep kam ha ki kam nonghikai ba lait jong ki skul Lower Primary bad Upper Primary hapoh ka Jylla.
Haba iakren bad ki nongthoh khubor, u President ka MSSASA Bah Aristotle C Rymbai ula ong ba ka Association kala aiti ia ka dorkhas sha u Chairperson ka State Education Commission myn ha ka 1 tarik Risaw, 2023 ban pynkha ia ki kam bad pynkynriah ia 12541 ngut ki nonghikai SSA ba don ha Jylla na ka State Implementing Society sha ka Tnad Education ka Jylla kat kum ki kyndon jong ka RTE/SSA.
Na kine ki 12541 ngut ki nonghikai SSA, ki don haduh 5814 ngut ki nonghikai Lower Primary bad 6727 ngut ki nonghikai Upper Primary kiba hap hapoh ka budget head ka Samagra Shiksha Abhiyan bala tip mynshuwa ka Sarva Shiksha Abhiyan.
U pyntip ba ka Association kala ioh ia ka jubab na u Member Secretary jong ka State Education Commission Ambrose ChM arak ba pyntip ba ka Comission kala iohpdiang ia ka dorkhas bad ba ka Commission kala shim ia ki sienjam ba donkam da kaba phah ia ka sha ka sub committee ba kan nang bishar bniah.
“Ngi, namar kata, ngi kyrpad ia baroh ki nonghikai SSA ba kin iatreilang bad ka Association namar ka jingiakren bad ka Sorkar ka dang iaid” ula ong.
Halor ki kam kiba lait, u Bah Rymbai u pyntip ba ki don haduh 22 tylli ki kam nonghikai kiba lait ha ki skul Lower Primary bad 89 tylli ha ki skul Upper Primary.
