Guwahati, Risaw 15: Ar tylli ki kynhun bar-ri kiba iakhun halor ka hok jong ki ritpaid trai Ri, kila shim khia bha ïa ka jingshah thombor bad jingpynkheiñ ïa ka hok longbriew manbriew ha ki thaiñ Chittagong Hill Tracts (CHT) jong ka Ri Bangladesh hadien ka jingshah weng noh ka Sorkar Awami League ba ïalam da ka Sheikh Hasina ha ka 5 tarik u Nailar bad kila dawa ruh ban tohkit bniah ia baroh ki jingkynnoh.
U Chairperson jong ka UN Permanent Forum on Indigenous Issues, u Hindou Oumarou Ibrahim bad u Special Rapporteur jong ka Rights of Indigenous Peoples u José Francisco Cali Tzay, ki la khot ia ka Sorkar ba shipor jong ka Bangladesh, kaba la ialam da u Dr. Mohammed Yunus ban shah iaka United Nations ban tohkit ïa ki jingkynnoh pynkheiñ ïa ka hok longbriew manbriew ha ki thaiñ Chittagong Hill Tracts (CHT).
Ki la kyntu ia ka Sorkar ban iatreilang bad ki nongmihkhmat jong ki ritpaid trai ri bad kiwei kiwei ki kynhun kiba trei ia ki kam ban pynkhlain ia ki bor treikam jong kine ki briew bad ban pynthikna ia ka jingiada ia ki hok jong ki ruh kumjuh.
Ka Sheikh Hasina, ka la hap ban phet krad noh na Bangladesh, tang hapoh katto katne minit, hadien ba ka la iehnoh ia ka kam Myntri Rangbahduh ha ka 5 tarik Nailar 2024, hadien ka jingia kynad kaba lam sha ka jingiap haduh 300 ngut ki briew.
Ka jingshah thombor ka la mih namar ka jingpyrshah ia ka rukom ai bhah ia ki kam Sorkar kaba la pynbna da ka Sorkar Bangladesh.
Ki riew shemphang jong ka UN ki la kren pyrshah ïa ka jingshah thombor bad jingshah lehbeiñ kaba dang ïaid shakhmat pyrshah iaki ‘Jumma’, ki jaitbynriew trai ri ha ka thaiñ CHT. Ki la ban jur iaka Sorkar Bangladesh ban weng ia kine ki jingeh.
