Dawa ka KSU | Weng ia ka jingpynbna thungkam Nonghikai tem Guitar | Pynshai ia ka jingthung MSC ia ki Nongtrei

Shillong, Risaw 14: Ka Khasi Students’ Union (KSU) hynne ka sngi Nyngkong, ka la dawa ban weng noh ïa ki jingpynbna ban thungkam nonghikai tem Guitar hapoh ka tnat Arts & Culture bad ki kam kiba hap hapoh jong ka Directorate of Forensic Science hadien ka jingkynnoh ba ki don ki jingleh bymhok.

Ka KSU kala dawa ruh ban pynshai halor ka rai jong ka Sorkar ban kyntiew kyrdan ïa ki 6 ngut ki nongtrei Sorkar sha ka kyrdan Meghalaya Civil Service (MCS).

Ha ka shithi sha u Secretary in-charge ka tnat Personnel & AR bah Cyril Diengdoh, u Chairman ka Employment Monitoring Cell ka KSU samla Reuben Najiar u la ong, “(Ngi) da ka jingsngewrit ngi kyntu ïa phi ba phin shimkhia kloi. Ka KSU ka dawa ba dei ban weng noh iaka jingpynbna laitkam (Advertisement) bad pynbeit noh mardor ïa katei ka jingpynbna na ka bynta ka post Guitar Instructor bad ki post kiba hap hapoh ka Directorate of Forensic Science khnang ban ailad ïa ki briew kiba biang ban Apply bad ruh ban pynshai ïa ki jingeh ba la pynpaw da ka seng ha kaba kyntiew ïa ki nongtrei sha ka kyrdan MCS”.

U samla Ruben u la ïathuh ba ïa ka kam ‘Guitar Instructor’ la pynbna ha ka 19 tarik Nailur 2024 ha ka State Institute of Arts & Culture. Da kaba pynshong nongrim ha katei ka jingpynbna, ka don tang 1 (kawei) ka kam kaba la pynbna na ka bynta ‘Guitar Instructor’ bad ia katei ka kam la ai sha ka thup Garo Category.

“Ka kam Guitar Instructor ha State Institute of Arts & Culture ka don 2 (ar) bad 1 (kawei) na ki kam kumba long mynta la dep aiti ha uwei u kyrtong Garo. Kumta, ka katei ka kam ba la pynbna ka dei ban long na ka bynta ka thup Khasi-Jaintia Category khamtam hadien ba ka kam ka la thylli hadien ba la shongthait u nongtrei Khasi” u la ong.

Kane baroh kadei ka jingleh bakla hi daka tnat Personnel & A.R da kaba pyntreikam ia ka Roster System naduh ki snem bala leit, kaba long pyrshah ia ka rai jong ka Sorkar ban pyntreikam shakhmat. Ka KSU ka pynrem jur bad pyrshah ïa kum kane ka jingleh kaba la knieh noh ïa ka hok jong ki Khasi bad ka dawa ba hap ban pynbeit noh mardor” u la pynpaw.

U samla Ruben u la pyntip ruh ba na ka bynta ka kam Scientific Officer, Senior Scientific Assistant, Scientific Assistant ha ka Mobile Forensic Crime Scene Uni,t kaba hap hapoh ka Directorate of Forensic Science, kiba don 27 tylli ki kam baroh kaba la pynmih biang ha kajuh ka jingpynbna.

“Hangne ruh, ka seng ka la ïohi ba ka Directorate of Forensic Science ka la ïaid lait na ki kyndon ba la don lypa hapoh ka Meghalaya Forensic Science Laboratory Services Rules, 2021 ha kaba da kaba pynshong nongrim ha ka jingpynbna kaba ailad tang ïa kiba don kyrdan ha ka Forensic Science ban ïoh applai ha ka jaka ban ailad ïa kino kino ki samla pule Science ban lah ban applai kumba la kdew ha ki kyndon bad kaba la bud ruh da kiwei pat ki Forensic Science Lab ha kylleng ka Ri. Ka KSU ka la dep ban ïakren ïa kane ka mat sha u Director jong ka Directorate of Forensic Science hynrei kam shym la don kano kano ka jingpynshai ha kaba ïadei bad kane bad ka Seng ka maham ba kane ka jingpynrung kam ba la kdew ka dei ban ïaid katkum ki kyndon bad ym dei ban shah pynthut bad pynkhihwin ha kano kano ka sorkar ne ophisar ban kyrshan ïa uno uno u kyrtong jong ki” u la ong.

Ha kajuh ka por, ka KSU ka la buh jingkylli ruh ia ka jingpynbna jong ka Sorkar kaba la kyntiew ia ki 6 ngut ki nongtrei Sorkar sha ka kyrdan Meghalaya Civil Services kiba dang trei mynta hapoh ki tnat Sorkar bapher bapher.

“Ka KSU kam don kano kano ka jingshun pyrshah ïa ki bad ka kitbok kitrwiang ïa ki ha ka lawei jong ki hynrei ka Seng ka kwah ban buh jingkylli ïa ka tnad Personnel & A.R, balei ki hap ban kyntiew kyrdan ïano ïano kiba don ha ki kam bapher bapher sha ka Civil service.

Hato ka long kaba dei ban leh kumta ne kadei tang ban pynmih ia ki khun jong kito kiba ialong paralok. Lada uno uno u briew u lah ban kiew kyrdan sha ka MCS, te kam don jingmut ban pynlong ia ka eksamin MCS. Ka KSU ka dawa na ka tnad Personnel & A.R ban pynshai kumno ka jingjied ïa kitei ki kyrtong ba la kdew, ki nongrim bad ki jingnoh synñiang kiba ki la noh synñiang ban ïoh ïa kum kane ka jingkiew kyrdan,” u la ong.