Dawa ka KSU ia u CM ban pynlait noh ia ka scholarship ba pynsahteng palat shisnem

Shillong, Jylliew 08 : Ka Khasi Students’ Union (KSU) kala dawa ia u Myntri Rangbah ka Jylla Conrad K Sangma ba un tuklar bad pynsted wut wut ha kaban pynlait noh ia ka Chief Minister’s Scholarship, kaba pynpaw ba bun ki khynnah pule ba dei ban ioh, kila shu ap la palat shisnem wat hadien ba kila pynbiang lut ia baroh ki jingdonkam.

Ha ka shithi bala aiti sha u Myntri Rangbah ha ka 1 tarik Jylliew, 2026, ka KSU Education Cell ka pynpaw ia ka jingsngew khia halor ka jingbym lah jong ka Sorkar Jylla ban pynlait ia ka CM Scholarship sha ki khynnah pule kiba la pyndep ia baroh ki kyndon kiba la buh.

U Education Secretary ka KSU Alerick Kharjana ula ong ba ka jingiai pynslem kala buh ia bun ki khynnah pule ha ka khep kaba eh namar ki shaniah ha ka jingiarap song pisa ban pynbteng ia ki jingpule jong ki.

“Kala iaid palat shisnem mynta naduh ba ki khynnah pule ba bun kila pyndep ia baroh ki jingdonkam kat kum ki kyndon kiba la buh, hynrei haduh mynta kim pat ioh satia ia ka scholarship kaba dei ka hok jong ki” ula pynpaw.

“Kane ka jingpynslem kala wanrah ia ka jingeh kaba khraw ia bun ki khynnah pule kiba shaniah ha ka CM Scholarship ban kyrshan iala ka jong ka jingpule” ula bynrap.

Ka KSU ka pynpaw ba ka ngeit ba u Myntri Rangbah, kum u Khliehduh ka Sorkar Jylla, un shim ia ka jingkitkhlieh nab aka lawei jong ki samla ka shong eh ha ka jingioh ia ka jingkyrshan ha ka por kaba biang.

Ka KSU kala kyntu ia u ban bishar bha ia kane ka kam bad pynthikna ba ka scholarship ka poi sha baroh ki khynnah pule kiba dei hok ban ioh.

Ka KSU kala dawa ruh ia ka Sorkar ba kan pynbna paidbah ia ka jingbuh por kaba shai haba iadei bad ka jingpynlait ia ka pisa khnang ba ki samla kin ioh ia ki jingtip, bad ban buh ia ka helpline ne ki lad ban ujor na ka bynta kito kiba shem jingeh lane kiba kwah ioh jingtip halor ka CM scholarship.

Kala dawa ruh ia ka Jylla ban pynthikna ba kum kine ki jingpynslem kim dei shuh ban jia ha ki snem ban wan.