Shillong, Jymmang 08 : Ka Khasi Students’ Union (KSU) ha ka sngi Palei kala dawa ia ka Sorkar Jylla bad ka Tnad Pule Puthi ba kan shimkhia bad leh eiei mardor halor ka rukom pynngat jaka thoh eksam (examination centre) ia ki samla pule ki ban iakhun ia ka eksam Central University Entrance Test – Undergraduate (CUET-UG).
Ha ka kyrwoh, u Education Secretary ka KSU Pynkmenlang Sanmiet ula ong ba bun bah ki samla pule na Jylla kila shah pynngat thoh eksam shabar ka jylla Meghalaya kum ha sor Aizawl, Dibrugarh, Dispur bad kiwei kiwei. Kane ka jingpynngat ba bakla kala kylla long ka kam ba jia na ka por sha ka por namar kum kine ki juh ki jingjia kila jia ha ki snem bala leit noh.
Ka KSU ka sngewbha jur ba ka National Testing Agency (NTA) ka dang iai bteng ban phah thoh eksam ia ki samla pule sha ki jaka (centre) ba sha jngai, kaba wanrah ia ka jingeh bad ka jingsyllang ia ki samla pule jong ka jylla.
Ula ong ba ka Seng kala dep kren teng ia kane ka kam lyngba ki shithi bad ki jingkren paidbah ha kine ki snem bala leit noh. Dang shen, ka Seng kala ai ia ka shithi sha u Myntri ka tnad Pule Puthi ha ka 19 tarik Lber, 2025, ba kyrpad ban shimkhia mardor ia kane ka jingeh.
“Wat hapdeng kine ki jingpyrshang, ka NTA sa shisien kam shym la lah ban pynbeit ia kane ka kam, kaba pyni ia ka jingbteng ban ym suidniew ia ki jingeh bala mad da ki samla pule ha Meghalaya” ula ong.
“Kane ka rukom leh ym tang ka buh ha ka jingeh ia ki samla pule ba ki kmie kpa ha ka liang ka leit ka wan, ka jaka sah bad ka pisa tyngka hynrei ka buh ha ka jingma ruh ban pynkynran dien noh ia ki na ka jingiakhun ia ka eksam CUET-UG. Ka Seng ka kheiñ ïa kane ka jingbym shimkhia kaba ju jia man ka por da ka NTA kum ka jingkhanglad kaba khraw ïa ka jingïoh lad ba kumjuh na ka bynta ki samla pule na ka jylla,” u la ong.
Ula ong “Kumta, ka KSU lyngba kane ka khubor, ka dawa jur ia ka Sorkar Meghalaya ban leh eiei mardor ha kaban pynbeit ia kane ka kam bad ki bor ba dei khmih na ka Sorkar Pdeng. Ia ka hok bad ka bha ka miat jong ki samla pule dei ban ai jingiada, bad ban pynbeit bha, dei ban leh ha kata ka rukom ka ban pynthikna ba kin lah ban iakhun ia ka eksam CUET-UG khlem ka jingkulmar jingmut, jingpynthut ne ka jingpynkit ba khia”.
Ha ka jingioh lum jingtip ka Shlem, la pyntip ba ki don ruh ki samla pule na Jylla kiba la ngat ban thoh eksam shaduh ka Andaman & Nicober Island.
 ha ka sngi Palei kala dawa ia ka Sorkar Jylla bad ka Tnad Pule Puthi ba kan shimkhia bad leh eiei mardor halor ka rukom pynngat jaka thoh eksam (examination centre) ia ki samla pule ki ban iakhun ia ka eksam Central University Entrance Test - Undergraduate (CUET-UG).){kind=link}