Shillong, Jymmang 08 : Ki shipai India kila pynpulom ia ka jingpyrshang jong ka Pakistan ban ther bomb ia ki jaka shipai ha ki 15 tylli ki jaka sor ka Ri bad kala ai jingmaham ba tyngeh ba lada hiar thma biang ia ki nongkynti ki shipai, ka jubab kan long kaba tyngeh.
Kum ka jingpynphai kylla, ki shipai India kila ioh ban pynjulor ia ki kor Air Defence jong ka Pakistan ha Lahore ha ka step sngi Palei.
Kane ka jingpyrshang ther bomb ka Pakistan ka dei kaba la leh kum ka jubab ia ka jinghiar thma na suin jong ka India ia ki ktem lehnoh ka PoK bad ha Pakistan ha ka step sngi Balang. Ha ka miet 7-8 tarik, ka Pakistan kala pynher ia ki drone bad ki namding sha ki ktem shipai ba don ha Northern bad Western India.
Kine ki jaka ba thmu ther bomb ka Pakistan ki kynthup ia ka Awantipur, Srinagar, Jammu, Pathankhot, Amritsar, Kapurthala, Jalandhar, Ludhiana, Adampur, Bathinda, Chandigarh, Nal, Phalodi, Uttarlai bad Bhuj. Ka India kala lah ban tehlakam ia kine ki jinghiar thma da kaba pyndonkam ia ki kor Integrated Counter-Unmanned Aerial System (UAS) bad Air Defence Infrstructure.
Ki bor Sorkar ki dang lum mynta ia ki phngit jong kine ki tiar na kylleng ki jaka, kiba pynthikna ia ka jingdon bynta ka Pakistan ha kane ka jingpyrshang ban ther bomb.
Ka Ministry of Defence ka India ha ka kyrwoh, kala niew ia ka operation ba ai kyrteng ‘Operation Sindoor’- kum ka jingpynphai kylla kaba da leh thik tang ia ki lehnoh namar ka jinghiar thma ha Pahalgam, kaba la shim ia ka jingim ki 26 ngut ki nongshangkai pyrthei.
Ka kyrwoh kala pynshai ba kane ka jingther bomb ka India kala kiar khnang ia ki jaka jong ki shipai, haba pynleit jingmut beit thik tang ia ki jingtei jong ki kynhun lehnoh.
Hynrei namar ka jingnang pynheh ka Pakistan, ki shipai India kila nang pyniar ia ka jubab ha ka sngi Palei da kaba ther bomb ia ki Air Defence Radar jong ka Pakistan ha kylleng ki jaka kynthup ia ki radar ba don ha Lahore.
Ha kajuh ka por, ka Pakistan kala pynkhlain ia ka jingther kuli bad mortar ha kylleng ki jaka ka Line of Control (LoC) ba kynthup ha ka thain Kupwara, Baramulla, Uri, Poonch, Mendhar, bad Rajouri.
Kine ki jinghiar thma ka Pakistan kala shim ia ka jingim ki 16 ngut ki briew ba kynthup ia 3 ngut ki longkmie bad san ngut ki khynnah.
Ki shipai India ruh kila ther mar kylliang ban pynsangeh ia ka jingther kuli ka Pakistan khnang ban iada ia ki mynsiem briew.
