Shillong, Naitung 02: Ka Khasi Students Union (KSU) hynne ka sngi Ba-ar, kala kyntu ia ka sorkar jylla ba kadei ban pynthikna ba kan don ka jingleh khuid bad ba shai ha ka jingbhah iaka MBBS Seat ha kylleng ki jaka pule lyngba ka bhah jong ka jylla.
“Ngi lah aiti ia ka dorkhas ha ka myntri ka koit ka khiah ka Dr Ampareen Mazel Lyngdoh ban kyrpad ia ka tnad ba kan pynshai ha ka jingdon jong ki seat ha ki jaka pule doctor kiba hap hapoh jong ka bhah jong ka jylla” ong u Education Secretary ka KSU u Pynkmenlang Sanmiet ha ka kyrwoh khubor.
“Ha kajuh ka por, ngi kyntu ruh ia ka tnad ba kadei ban pynthikna ba kadei ban pynthikna ban don ka jingkhuid jingsuba ha ka rukom bhah ia ki MBBS Seat,” ula ong.
Ula ai jingmut ruh ba lada jia ba ki samla Khasi ne Garo, ki ioh ban rung lane ki kynjoh ban poi sha ka Open Category, kum ia kita dei ban pynrung beit sha katei ka Open Category, khnang ba kiwei ki samla na ki Reserved Category ruh kin ioh bynta lang ban rung ha ki Category kiba la bhah kyrpang iaki.
Ka KSU kala ai jingmut ruh ba lada don ki samla, hadien ba kila pass iaka eksam NEET, lada ki poi sha ka kyrdan ban ioh rung sha ka All India Quota, kum ia kita ruh dei ban ailad, khnang ba kin don shuh shuh ki samla na ka jylla kiban iohlad ban leit pyntbit ha ka kam Doktor.
Ka KSU ka kyrpad ruh ia ki Shnong, ki Hima ha kylleng ka bri u Hynniewtrep ban kiar ha kaban ai kot pynshisha lane Residential Certificate iaki bym dei ki paradoh parasnam, namar kane ka ktah iaka bhah leit pule ba la mang kyrpang iaki samla trai ri kiba don jingthmu ban leit pule doctor.
“Ngi kyntu ia ka Sorkar ba kam dei ban pdiang kulmar iaki kot ki sla jong ki bar jylla kiba myllien ban ialam bakla bad ruh kiba kam ba kidei ki nongshong shnong jong kane ka Jylla tang ban ioh bynta ha ka bhah leit pule Doktor kaba dei hok tang ia ki samla pule trai Ri” ula pynkut.
