Shillong, Nailar 17 : Ka Jaintia National Council (JNC) ha ka sngi Palei kala dawa ia ka Sorkar Jylla ba kan shong bishar thymmai ia ka Standard Operating Procedures (SOP) ha kaban ai ia ki prospecting licence bad ka mining leased ban tih dewiong.
Ha ka dorkhas bala aiti sha u Secretary ka Tnad Mining & Geology Bah E Kharmalki, u President ka JNC Sambormi Lyngdoh ula ong “ Ka JNC ka sngew ba ka Sorkar Jylla kan sngewbha ban mynjur ha ka ban khate ia ka jingdonkam jaka jong ka par na ka 100 hectare sha ka jaka kaba lah ban pdiang khnang ban ailad ia ki nongtih dewiong kiba rit ba ria ba kin apply ia ka mining lease haba iadei bad ka jingtih dewiong hapoh ka District”.
U Bah Lyngdoh ula ong ba u Bah Kharmalki ula pyntip ia ka kynhun ba kan sa don ka jingialang hapdeng ka Sorkar Jylla bad ka Ministry of Coal India ban iakren halor kane ka kam bad lehse ka lah ban don ka jingpynduna ia ka jingdonkam jaka haba iadei bad ka jingdon par dewiong.
Ula ong ba kat kum ka sorjamin jong ka National Green Tribunal (NGT) ba 31 tarik Nohprah, 2018, la shem ba ki kam tih dewiong barit baria kila sdang ban mih ha Meghalaya tang naduh ki pdeng snem 1970 khamtam ha Ri-lum Khasi bad Jaintia. Nalor kane, ka Jaintia Hills District ka dei kaba la ithuh kum ka district ba pynmih bun tam u dewiong ha ka Jylla watla ka don duna bha ia ka par dewiong.
Ula ong ba ki nongtih par trai shnong bad ki nongdie ha ka thain kiba la iadonbynta ha ka kam dewiong la palat 30 snem, kin sa duh noh iala ka hok lada la pyntreikam ia ka SOP ha ka Office Memorandum namar kim kot bor ban thied ia ki jaka kiba heh.
Pule lang ia kane: Bah buh jingthoh ia ki Riti Dustur tynrai : Phah ka KHADC ia ka jingtyrwa ban ioh song pisa
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
