Nongpoh, Risaw 14: Ka Joint Action Committee Against Casino(JAC-AC) kala dawa ia u Myntri ka Tnad lum khajna James K Sangma ban pynmih da ka jingpynbna (Notification) bala pynduh pyndam ia ka Meghalaya Regulation of Gaming Act, 2021, ban pynthikna ia ka rai ba ula shim.
“Ngim pat hun satia ia ka jingkular jong ka Sorkar Jylla kumba la kren da u Myntri ka Tnad lum Khajna tang ha ki lad pathai khubor. Ngi kwah ban pynmih da ka jingpynbna bala pynduh pyndam ia kane ka ain” ong u Bah Ferdinald Kharkamni, Secretary ka JAC-AC haba iakren bad ki lad pathai khubor.
Kane ka rai jong ka JAC-AC la shim ha ka jingialang ba kyrkieh bala pynlong hynne ka sngi thohdieng ha Nongpoh.
Kat kum ka jingong jong u, tang ka jingthoh ne jingpynbna (notification) kaba lah ban pynthikna ba ka Sorkar kala pynduh pyndam ia kane ka ain khamtam ia ka jingthmu ban wanrah ia ki ktem khalai casino hapoh ki jaka khappud ka Ri-Bhoi.
U Bah Ferdinald uba dei ruh u President ka KSU-North Khasi Hills, ula ong ba ki sienjan bala shim ban pyrshah ia ka casino kum ka signature campaign, kan dang iaid shakhmat ha kylleng kithain ka Ri-Bhoi District.
“Lada ka Sorkar ka dang iai kuman ban sngap ia ka jingdawa, ka JAC-AC kan pynlong noh da ka jingiaid paidbah na Nongpoh sha Secretariat kumba la dep ban pynbna” ula ong.
