Shillong Nailar 13: Ka ïing ka sem jong u Bah Cherishterfield Thangkhiew kala dawa na ka sorkar jylla ba kan pyllait noh iaka kaiphod jingtohkit halor ka jingshah siat ïap u bah Cheris khnang ba ka iing ka sem bad u paidbah ka jylla yn ym sah haka umdum.
“Kumba ka sorkar kala kular ban pyllait paidbah iaka kaiphod Judicial Enquiry haka 9 tarik u Nailur hapoh ka ïingdorbar Thawaiñ, kadei ban pyllait ia ka kaiphod ha katei ka sngi bad kam dei ban kylla ktien shuh” ong u Bah Granary Starfield Thangkhiew, u Para jong u Bah Cherishterfield.
Mynta ka sngi ka 13 tarik Nailar 2022, ka dei ka sngi ba dap shisnem thik ka jingshah siat iap u Bah Cheristerfield ha ka jingkhynra jong ki Pulit ia ka Iingsah, ha Mawlai Kynton Massar.
U para u Bah Che u la pynpaw iaka jingbynniaw ba ka sorkar kam shim la pyllait satia iaka kaiphod jingtohkit watla kala iohpdiang iaka kaiphod na u Nongbishar uba la shongthait.
“Kane kala kum pyrkhat bad pynsuba sniew pynban ia ngi ba ka lah ban don ka jingpynduh pyn dam ne leh eiei ia katei ka kaiphod jingtohkit hynrei ka iing ka kyrmen beit ia kaba bha ba ka kaiphod ka nym long kaba noh shilliang” ula ong.
U la ong, ka sorkar ka dei ban bat iala ka ktien khnang ban lait naka huri hura bad naka liang ka iing ka sem bad ki sengbhalang ruh kim kwah ban mih kano kano ka jinghuri hura.
“Hynrei lada ka sorkar ka dang iai pynslem ban pyllait iaka kaiphod bad lada mih kano kano ka huri hura, ka sorkar jylla hi kadei bam shim hi iaka jingkitkhlieh” ula ong.
“Ngin ap beit iaka 9 tarik ban iohi ia kaei ka jingshem jong ka kaiphod bad lada jia ba ngim hun iaka kaiphod, kum ka iing ngim banse ban shim iaka sienjam ban leit ujor sha ka National Human Right Council (NHRC), sha ka iingkashari High Court ne wat shaduh Supreme Court” ong u Bah Thangkhiew.
