Shillong, Naiwieng 21 : Ka Hynniewtrep Youth Counci(HYC) ha ka sngi Palei, kala dawa ia ka Sorkar Jylla ban lum thup bha ia ka kyrteng jong ki phetwir kiba wan na Manipur ban riehtngen ha Meghalaya namar ka huri hura ha ka Jylla jong ki.
Ha kajuh ka por, ka HYC kala dawa ruh ia ka Sorkar ban pynlong ia ka survey bad ban buh thup ia ka jingdon ki nongshong shnong bas ah hapoh ka Shillong Contonment Board bad ban pynduh ia ka jingithuh ia ki Committee/Council ba ki iathaw hynrei ban ai bor ia ki Dorbar Shnong ba kin pyniaid ia kine ki jaka.
Ha ka dorkhas bala aiti sha ka Deputy Commissioner ka East KHasi Hills Kong RM Kurbah, u President ka HYC Roykupar Synrem ula pynmaw ia ka jingsngewkhia halor ka jinglong jingman ha Jylla Manipur kaba la don hapdeng ka jingiakynad bad umsnam la palat 17 bnai bad ha kajuh ka por ula sngewnguh ruh ia ka Sorkar Jylla bad ki kynhun bapher bapher kiba ai jingiarap bad jaka rieh ia kito kiba shah ktah ha ka jingiakynad kaba jia ha Manipur.
“Hynrei, kum ka Seng ngi don ruh ka jingsngew ba na ka bynta ka jingmyntoi ka Jaidbynriew lajong, dei ban buh jingthoh ia ka iaid ka ieng jong ki phetwir bad ban lum kyrteng da ki bor District bad ki bor ba dei khmih bad ynda ka jinglong jingman ha Manipur kala jai jai biang, dei ban phah leit phai noh ia kine ki phetwir shala ki jong ki jaka” ula ong.
“Kane ka long ruh haba buh ha ka jingmut jingpyrkhat ba kin don ki riew bymman kiba lah ban shim kabu ia ka jinglong jingman bad pynlong ia ka Shillong bad ka Meghalaya kum ka jaka ban leh ia ki kam bapher bapher khamtam ka jingkhaii ia u droks bad kiwei ki jingdih pynbuaid, lada ym lah ban buh jingthoh ia ka iaid ka ieng jong kine ki briew hapoh ka Jylla” bynrap u bah Roykupar.
Haba ban jur ia ka jingdonkam ban buh jingthoh ia ki briew kiba sah ha Shillong Contonment Area, une u Nongialam ka HYC ula kynnoh ba katto katne ki jaka kiba hap hapoh ka Shillong Contonment Board kila kylla long ki ktem jong ki kam bymman kum ka jingkhaii bad pyniaid iew ia u droks hapoh sor bad ruh ka ktem ia ki mynder ban wan sha Jylla.
Kat kym ka jingong jong u, ki jaka ba hap hapoh ka Contonment Board lane ka Defence Estate Officer ka dei shabar u pud u sam jong ki Dorbar Shnong bad namar kane, ka iaid ka ieng ki briew ka dei ka bym lah ban pyrrkhing ne peitngor.
Kane kala paw na ka jingjia ba dang shen ha Lum Survey ha kaba haduh 80-100 tylli ki longiing ki dei kiba la sah beain ha katei ka jaka bad kumjuh ruh ka jingioh kem ia ki nongkhaii droks na ka thain Contonment.
