Mairang, Nailur 20 : Ka Hynniewtrep Youth Council-North West Khasi Hills, kala dawa ia u Deputy Commissioner ka Eastern West Khasi Hills Bah Gideon Kharmawphlang, ban khang noh ia ki jingpynlong ia ka jingiakop khwai dohkha hapoh ka District.
Ka HYC-NWKH hapoh ka jingialam u General Secretary Shembor Langrin, kala leit iakynduh ia u DC ha ka 19 tarik Nailur ban buh ia kane ka jingdawa.
Kane ka jingdawa kala mih ruh hadien ka jingjia ba sngewsih kaba wan hap ha kawei ka Longkmie kaba la duhnoh ia I Khunlung ba dang shu kha tang na ka daw ka jingdheng kali kaba jur, kaba la mih na ka tamasa khwai dohkha ha Pamphyrnai, Ksehkohlong, West Khasi Hills, myn ha ka 16 tarik Nailur.
Une u Nongialam ka HYC u pyntip ba u DC ula iathuh ba ula dep phah da ki jingthoh sha baroh ki nongpyniaid ia ki jingiakop khwai dohkha hapoh ka District ba ki dei ban bud ia ki 7 tylli ki kyndon bala buh da ki bor pyniaid district ban pynlong ia ki jingiakop khwai dohkha.
U pyntip ba ki bor district kila buh ruh ia ka kyndon ba lada ki nongpyniaid ki pynkhein ia ki kyndon, u DC u lah ban khang noh ia ki jingiakop khwai dohkha.
Halor kane, ka HYC kala kyntu ia ki nongpyniaid ia ki jingiakop khwai dohkha ba ki dei ban bud ryntih ia ki kyndon bala buh da ki bor District khnang ba kan ym ktah ia ka iaid ka ieng ki paidbah.
