Nongpoh, Lber 06: Namar ka jingjur palat ka jingaksiden kali kaba lam sha ka jingduh ei ki mynsiem briew ha ka thain Umsning, ka seng Hynniewtrep Integrated Territorial Organization (HITO) kala leit ban buh da ka dorkhas hakhmat u Superintendent of Police Ri Bhoi District ba un buh noh da ki pulit traffic ha ki jaka cross kali (Junction) kiba don hapoh u surok Umsning Bypass terter.
Ka HITO ba la lamkhmat da u General Secretary Bah B. Umbah kila air uh ia kane ka dorkhas ha u Officer Incharge ka Umsning Police Station ba kyrpad na ki bor pulit ban pynkhlain ia ka jingdon jong ki pulit traffic ha ki jaka jam na shilliang sha shilliang ha u surok Umsning Bypass khamtam kum ka lad Patarim, lad Umpih, lad Umtrew bad kiwei kiwei.
Haba kren bad ki Nongthoh Khubor, u Bah B Umbah, u la pynpaw ba ka seng ka don ia ka jingsngewkhia halor ki jingjia aksiden kali ba man ka por ha surok Umsning By-pass bad ong ba ka daw hi ka dei namar ka jingniah sted palat jong ki nongniah kali.
Ula ong ba ka long kaba donkam ban buh noh da ki pulit pyniaid kali ha manla ki lad jong kane ka surok khnang ba kine ki Pulit kin lah ban pyniaid ia ki kali ha ka rukom kaba dei ban kiar na kino kino ki jingjia ba sngewsih.
