Shillong, Risaw 11: Ka Hynniewtrep Border Dispute Redressal Forum (HBDRF) hynne ka sngi Saitjain kala dawa na ka Sorkar Jylla ban siew bai lutksan iaki nongrep lada kim ioh ban leit ot kba bad ha kajuh ka por kadei ban siew bai lutksan ia kito ki nongrep ki bym ioh ban thung jingthung ne rep hapoh ka shnong Lapangap, West Jaintia Hills.
Ka HBDRF ka dawa ia ka bailutksan da ka kdew ba ki nongrep jong ka shnong Lapangap ki sngew syier mynsiem namar ka jingbym long shngain ka thain namar ba mih ki jingiakynnad naka por sha ka por hapdeng ki jaidbynriew Karbi ka Jylla Assam bad Pnar ka Jylla Meghalaya.
Haba kren sha ki lad pathai khubor u Chairman ka HBDRF u Bah Chandame Sungoh ula iathuh ba kiba bun ki nongshong shnong Lapangap West Jaintia kidei ki nongrep bad naduh ki snem bala dep ki nongrep ki syier mynsiem ban leit sha la ki lyngkha.
Lah ban kdew ba ha ka 9 tarik kala mih ka jingiakynnad hapdeng ki Karbi bad Pnar ha kaba uwei u Karbi na Assam ula khlad bad bun ngut kila mynsaw na baroh artylli ki Jylla.
U Bah Chandame ula ong, ba ka jingiakynnad kaba la mih ha ka 9 tarik kadei hi namar ka jingkawang maw bad siat jri ki jaidbynriew Karbi iaki nongshong shnong Lapangap katba ki dang ot kba wat hapdeng ka jingdon lang ki Pulit ka Meghalaya bad Assam.
“Kane kam dei shuh ka sien banyngkong hynrei na ka por sha ka por ki Karbi ki ju ïai pyndik ïa paidbah ha kaba ki leit ot kba bad dei namar kane ki nongshong shnong Lapangap kim banse ban leit bun paid sha ki lyngkha ban lait na ka jingshah thombor” ong u Bah Chandame.
U Bah Chandame ula ong ba mynta ka kynti ki nongshong shnong ka Lapangap ki don hapdeng ka jingsyier mynsiem bad dei namar kane ka Forum ka dawa naka Sorkar Jylla ban pynbun ki bor pahara ha kane ka shnong.
 hynne ka sngi Saitjain kala dawa na ka Sorkar Jylla ban siew bai lutksan iaki nongrep lada kim ioh ban leit ot kba bad ha kajuh ka por kadei ban siew bai lutksan ia kito ki nongrep ki bym ioh ban thung jingthung ne rep hapoh ka shnong Lapangap, West Jaintia Hills.){kind=link}