Shillong, Nailar 14 : Ka Hynniewtrep Border Dispute Redressal Forum (HBDRF) ka la kyntu ia ka sorkar jylla ban ithuh bad pynrung ia ki 36 tylli ki shnong jong ka Elaka Labang Nongphyllut kiba hap hapoh ka Block I, ha ki kot ki sla jong ka jylla bad ki rukom jied nongmihkhmat.
“Ngi kyntu ia ka sorkar jylla ban leh mardor ia ka kam ban ithuh bad pynrung ia ki shnong ha ki kot ki sla jong baroh ki tnad sorkar jylla,” ong ka Forum ha ka dorkhas ba la aiti sha u Chief Secretary ka Jylla Bah DP Wahlang ha ka sngi Palei.
Ka Forum ka la kyrpad ruh ïa ka sorkar ba kan bthah ïa u Chief Electoral Officer (CEO) bad ki bor ba dei peit ban pynïasoh ïa ki shnong ha ka rukom jied nongmihkhmat, kynthup ïa ka jingruid map ïa ki hapoh ki Legislative Assembly Constituency kiba biang jong ki bad ban kynthup ïa ki nongshong shnong ha ka thup kyrteng thep vote.
“Ngi kyntu ruh ia ka sorkar ba kan pynmih ia ka jingpynbna kaba ithuh ia kine ki shnong kum shi bynta ba hap ha u pud u sam ka jylla ka ban long katkum ki map ba la mynjur bad ki jinglap jong ka joint inquiry, ban pynkut noh ia ka jingbym shai ha ka rukom synshar,” ka la bynrap.
Kat kum ka dorkhas, ki shnong ba la kdew ki dei shi bynta jong ka Joint Inquiry Proceedings kaba la pynlong ha u snem 1958 hapdeng ka United Khasi & Jaiñtia Hills District Council bad ka United Cachar & Mikirs Hills District Council.
Da kaba pynshong nongrim halor kitei ki jingbishar, ka Jaiñtia Hills Autonomous District Council (JHADC) ka la dep ban pyntip sha ka Elaka bad thung ïa u Acting Dolloi bad ai Sanad sha ki Rangbah Shnong jong ki shnong.
Ka jingkyntait ia kine ki shnong na ka jingsynshar ka Jylla bad ka jingiajied nongmihkhmat ka la pynlong ïa ki ban shah kyntait ïa ki jingshakri ba kongsan bad ki jingtei bapher bapher ba iadei bad ka roi ka par, ka jingshah pynduh ia ka hok bad ka jingbym don nongmihkhmat ha ka synshar khadar, ka jingshah kyntait na ka khana samari ka Jylla, ki prokram pynroi, bad ki skhim jingïarap, ka jingbym shimkhia bad jingpyntroin ïa ki tnad synshar tynrai bad ki aiñ.
Lah ban kdew ba ka Forum kala dawa ban pynphai biang ia ki 36 tylli ki Shnong ba hap hapoh ka Block-I sha Meghalaya.
 ka la kyntu ia ka sorkar jylla ban ithuh bad pynrung ia ki 36 tylli ki shnong jong ka Elaka Labang Nongphyllut kiba hap hapoh ka Block I, ha ki kot ki sla jong ka jylla bad ki rukom jied nongmihkhmat.){kind=link}