Nongpoh, Nailar 14 : Ka kynhun Search & Rescue Team, ha ka sngi Palei, kila lap najan ka shnong Morodola ia ka met jong u samla 27 snem Wanphrangsngi Syiemlieh ba na Nongkyndang Saiden, kaba long hadien lai sngi ba u kynthih nalor ka jingkieng Wah Umtrew ba ju iatip kum ka jingkieng Byrnihat.
Ia kane ka met la lap da uwei u briew hadien ka jingper harud jong ka wah Umtrew.
Ka kynhun ki Pulit bad SRT kila leit shimti ia ka met bad kila pynkit noh sha Civil Hospital Nongpoh ban pyndep ia ki jingdonkam baroh hashuwa ban aiti sha ki bahaiing.
Kat kum ka khubor Pulit, une u samla ula kynthih na jingkieng Byrnihat ha ka 12 tarik Nailar hadien ka jingiahuri hura bad ki para nongdih droks, kaba la mih na ka jingiapher jingmut haba iasam ia ka pisa ba ioh naka jingiadie ia ka mobile tuh.
Haba pyrshang ban phet na ka jingbyrngem byrsit ki para nongdih droks, une u samla ula kynthih nalor ka jingkieng shapoh ka wah.
Ki Pulit kila register case halor kane ka jingjia bad ka jingtohkit ka dang iaid shakhmat.
