Nongstoin, Jymmang 25 : Ka FKJGP Rambrai Circle, kala dawa ia u Syiem ka Hima Rambrai ba un phah pynkhuid noh ia baroh u niut bala lum thup bad kynton harud jong ka Iew Rambrai-kaba shongdukan ki nongdie jingdie madan bad ba don syndah ki Iing ki sem jong ki nongshongshnong.
Ka Iew Rambrai ka dei ka iew ba khmih da u Syiem bad ka dei ka iew kaba la heh bha, kaba ka khaii ka pateng ka thnem bha hapdeng ki nongshongshnong ka thain Rimen baroh kawei.
La kynnoh ba ka Ophis u Syiem kala lum thup ia ki jaboh jabain ba pynkhuid napoh ka Iew ha katei ka jaka bad la shu ieh kynton ia ki niut la kum kawei ka jaka bret niut kaba ijli ban peit da ki khmat.
Ka FKJGP-Rambrai Circle ha ka sngi Saitjain, kala leit iakynduh ia u Syiem ka Hima Bah Order Syiem ban pan jingshai halor kane ka jingpyllang ia ki jaboh jabain jong ka iew ha kane ka jaka. Kila dawa ruh ba un phah pynkhuid noh mar mar ia kine ki jaboh jabain.
Ha kane ka sngi, ki Nongialam ka FKJGP ha ryngkat u Sordar Shnong Bah Maian Nongphud, kila leit ruh ba jied ia katei ka jaka ba pyllang ia ki niut bad lap dala ki jong ki khmat ba ki nongshong dukan madan kila hap ban shu siang da ki jain jri halor ki jaboh jabain bann die ia ki mar ki mata jong ki.
Haba iakren bad ki nongthoh khubor, u President ka FKJGP-Rambrai Cirlce bah Jiedstarland Lyngkhoi, u la ong ba na ka liang ka seng ka sngewkhia haduh katta katta їa ka jingbym shimkhia jong u Syiem halor ka khuid ka suba jong ka їew.
U iathuh ruh ba ka seng kan sa leit ban buh da ka jingthoh sha u Deputy Commissioner jong ka West Khasi Hills u ba dei ruh u Chiarman jong ka Swaach Bharat Mission, ba un tuklar lem halor ka jinglynton ki jaboh jabaiñ ha rud ka їew Rambrai.
U bah Maїan Nongphud sordar jong ka shnong u la ong ba ka shnong kam sngew tynnad satia їa ka jingpynlong jaka theh ñiut ha katei ka jaka. Hynrei kam lah ban leh ei ei namar ba katei ka їew ka hap hapoh ka jingpeit jong u Syiem.
Nalor kata u la ong ba ka jinglum thup їa ki jaboh jabaitnha katei ka jaka ka la ktah haduh katta katta ym tang їa ki nongdie jingdie, hynrei їa ki nongshong shnong kiba shong sawdong katei ka jaka. U la ong ruh baka lyer ka kit їa ki jaboh kum ki plasik, ki kot jot bad kiwei kiwei haduh phyllaw jong ki їing shong briew.
Utei u sordar u la kyntu ruh їa u Syiem ba un shimkhia ha ka ban wad da kawei pat ka jaka kaba kham pajih na їew bad napoh ka shnong ban pynlong kum ka jaka bret ñiut. Lada u shem jingeh ka shnong ka long kaba la kloi ban їatreilang, na ka bynta ban wan rah їa ka jingkhuid jingsuba kumba long kiwei pat ki jaka їew bad ki shnong ki thaw.
