Shillong, Rymphang 10 : Ka Congress hynne ka sngi thohdieng, kala kyrpad ia ka Election Commission ban ai biang ia ka bor pahara ia u Kyrtong na Gambegre Saleng A Sangma namar ka jingnang jur ki jingma ba ap ia ka jingim jong u.
Haba pynrem ia ka jingpynhiar kput shimet ia u Saleng, ki Media Coordinator ka AICC Adv Mathew Antony bad ka Bobbeeta Sharma lem bad u General Secretary ka AICC Sanjay Das, kila ong “ Ngi kyrpad ia ka Sorkar Jylla bad ka ECI ban ai biang ia ka bor pahara ia u kyrtong jong ngi Saleng Sangma namar ka jingnang jur ka jingma ba ap ia u”.
Kine ki Nongialam ka Congress kila ong ba u Saleng Sangma ula kyntait ba u la phetkrad lane shah behkthong ha ka kynhun ki Flying Squad bad dawa ban sei madan ia kino kino ki video clip halor kane, lada ka kynhun peitngor ka don.
“Tang namar kane ka jingjia, la weng iaka bor pahara na u Saleng bad la suba jur ba kane ka dei ka buit kam sain pyrthei bad ka jingpynhiar kput na ka Liang Synshar” kila kynnoh.
Ka Congress kala pynrem jur ruh ia ka jingiaid pyrshah Khristan jong ka BJP bad ong “Ngi pynrem jur ia ka kam jong ka Janajati Dharma Sanskriti Suraksha Manch (ka seng ba kyrshan da ka RSS) ba iadei bad ka jingdawa ban weng noh ia ka jingithuh ia ki briew bala kylla niam Khristan kum ki Schedule Tribe”.
Kat kum ka jingong jong ki, kane ka long pyrshah ia ka mynsiem ban burom ia ka jinglong tynrai jong ki Schedule Tribe jong ka thain Shatei Lam Mihngi, khamtam ki paid Khristan ha Meghalaya bad Nagaland.
Ki Nongialam ka Congress kila ong ba ka jingpynduh long ST ia ki paid riewlum bala long Khristan ka dei kaba la leh da ka jingthmu ban weng noh ia ka hok ba kila ioh lyngba ka Sixth Schedule jong ka Riti Synshar ka Ri.
“Ngi dawa ba kin panmap bad weng shisyndon ia kane ka jingdawa na ka BJP bad ban pyllait ia ki paid riewlum ka thain Shatei Lam Mihngi na ki jingma ba iadei bad ka snap kyrpang jong ki” kila ong.
