Shillong, Nailur 07: Ki nonghikai Skul kiba don hapoh ka lama jong ka All Meghalaya Upper Primary & Secondary Deficit Pattern School Teachers Association (AMUPSDPTA), hynne kasngi balang, kila dawa na ka Sorkar Jylla ba ka dei ban pynkylla noh ia ki 13 tylli ki skul na ka Deficit Pattern sha ka Deficit kaba pura.
“Ha Meghalaya ki don bun jait ki kyrdan ne Category jong ki nonghikai Skul bad ka Deficit Pattern ruh kadei kawei napdeng kitei bad ki don tang 13 tylli ki Deficit Pattern School ha ka jylla kiba kynthup lang ia 9 tylli ki Secondary School bad 4 tylli ki Upper Primary School” iathuh u Lindias Sangma u General Secretary ka AMUPSDPTA.
Kat kum ka jingong jong u, ki don haduh 85 ngut ki nonghikai deficit pattern bad 17 ngut ki bym hikai ha ka Secondary bad ki don 21 ngut ki nonghikai deficit pattern bad 4 ngut ki bym hikai ha ka Upper Primary bad haba khein kyllum baroh ki don 127 ngut.
U la iathuh, ba kine ki 13 tylli ki skul ki dei kiba la shah iehbeiñ naduh u snem 1989 ban shah kyntiew kyrdan kum ki skul Deficit kiba pura watla kitei ki skul ki long kiba dei hok ban ioh naduh katei ka por bad dei tang ka sorkar ha katei ka por kaba tip ia ka daw balei kitei ki skul kila shah iehbeiñ.
“Kitei ki skul kila ioh jingiarap lyngba ka Deficit Pattern naduh u snem 1993 hynrei ki skul kiba la ioh iaka Deficit kaba pura shwa bad hadien u snem 1989 kila ioh ia ki jingmyntoi kiba bun” ula ong haba bynrap “Hynrei ki Deficit Pattern ki ioh tang iaka tulop bad DA bad kim shym la ioh ia kiwei pat ki jingmyntoi bad ki nonghikai kila mad ia kiba bun ki jingeh mynta la palat 30 snem”.
Ka seng AMUPSDPTA kala buh jingkylli balei ka sorkar kam ai kumjuh ia ki jingmyntoi bad jingiarap kumba ioh ki nonghikai Deficit haba ki ruh ki trei kumjuh kumba trei ma ki hynrei kila shah iehbeiñ pat.
Une u nongialam u la pynkynmaw ba ka AMUPSDPTA ha u snem 2010 kala ai da ka dorkhas shaka sorkar jylla bad kala iai buddien ia kane ka jingdawa da kaba leit iakynduh ruh ia u Myntri Rangbah ka jylla u Conrad K Sangma nalor ka jing iakynduh ia u Myntri ka Pule Puthi Bah Lahkmen Rymbui bad ia u Symbud Myntri Rangbah ka jylla u Bah Prestone Tynsong hynrei kine ki Nongialam sorkar kim shym la ai kano kano ka jingkular hynrei kila pynpaw ba kin sa khmih bniah kaba khlem poi shaei shaei haduh mynta.
