Elekshon GHADC | Byrngem u MDC barim ban mudui sha Iingkashari ba hap don syrnot ST ki kyrtong

Shillong, Lber 03 : U MDC barim Sofior Rahman ha ka sngi Ba-ar, ula byrngem ban mudui sha Iingkashari pyrshah ia ka jingpynbna ka Executive Committee ka GHADC ba pynlong kongsan ia ki kyrtong ban hap don ia ka syrnot Scheduled Tribe (ST) ha ka elekshon GHADC ban wan.

Une u MDC ula ong ba kane ka jingpynbna ka GHADC ka dei kaba la shu leh donbor..ka bym shong ain bad kaba long bei-riti.

“Kane ka jingpynbna kam shym la iaid kat kum ka ain lane ka Riti Synshar. Kila pynkhein ia u Lat bad kim shym burom ia ka District Council Affairs Ministry” ong u Rahman.

Ula iasaid ba ka para 11 ka shah tang ia ki rule ha ka synshar khadar bad kano kano ka jingbuh kyndon ka dei ban wan na ka jingpynbna u Lat hapoh ka Sixth Schedule.

“Ka jingpynduh ia ka jinglong kyrtong ka dei ban wan na ka ain, ym ka jingsngew….hynrei ka pynkhein ia ka Article 14” ula ong.

“Kane kam dei kaba lah ban leh da ka jingpynbna paidbah da ka Executive Committee ka GHADC…ka Para 11 ka shah tang ia ka jingthaw ia ki rule ban pyniaid ia ki kam ki jam” ula ong haba bynrap “Kano kano ka ain sain pyrthei lane ka hok ban long kyrtong ka dei ban long kaba thaw da u Lat bad kaba hap iaid lyngba ka Tnad District Council Affaird da ka jingai jingmynjur u Lat. Kim lah ban leh ia kata”.

Ula bynrap shuh shuh da kaba ong “Lada pynlong kongsan ia ka syrnot ST, ka dei ban wan lyngba ka jingpynbna na u Lat hapoh ka Sixth Schedule, lem kumta kam dei satia kaba im ne treikam kat kum ka riti synshar. Ha ka synshar paidbah, ka jingpynduh long kyrtong ka dei ban wan na ka ain, ym na ki jingsngew”.

U Rahman ula ong ba ki bar jylla kila iashimbynta ha ka elekshon GHADC naduh u snem 1952, haba pyntip ba u Kpa jong u ruh u dei u MDC na Kharkutta.

“Ka Riti Synshar kam shym la khang ia ki bar jylla” ula ong haba maham ba kane ka hukum ka long kaba jingma ia ka jaidbynriew jong ki.

“Ka long kum ka jingma ia ki paid bar jylla-na ka sngi sha ka sngi….ki khot ia ngi ki nong Bangladesh” ula ong haba pynpaw “Naduh ba mih ka Bangladesh, ngi dei jong ka India…shuwa u 1972 ngi don ha Assam bad haba pynkha ia ka Meghalaya, ngi la don hangne. Ki dei ban iaid kat kum ka lynti jong ka Sorkar hynrei ki bar jylla kila shah khein pynban kum ki nong Bangladesh”.

U Rahman ula kyntu ia ka Sorkar Jylla ba kan tuklar halor kane ka jingpynbna ka GHADC.

“Ha Meghalaya kane ka hap hapoh ka DCA, kumta kin hap ban bud ia ka policy ka Sorkar Jylla. Lada ki kwah ban mynjur ia kano kano, ka dei ban leit sha ka DCA, hadien kata sha u Lat bad hadien ba ai jingmynjur u at, kan sa long ain- lem kumta kam long ain satia” ula ong.

U Rahman ula kyrpad ia ka Sorkar Jylla bad u Myntri Rangbah ka Jylla ban pynshai ia kane ka jingpynbna da kaba ong “Nga kyrmen ba kin ong ba kine ki rules kim treikam satia. Ka long kaba donkam ban iohsngew n aka Sorkar, na ka tnad DCA”.

Une u MDC barim ula pyntip ba ka kynhun jong u, kala iakynduh ia u Lat ka Jylla bad kan sa leit tynjuh ia ka jingpynbna ka GHADC ha Iingkashari lada kam weng noh ia ka.