Shillong, Lber 31 : Ka All Garo Hills Merchant Association (AGHMA) hynne ka sngi Thohdieng, kala ong ba ka jingbuh sa kawei ka Nongbah hapoh ka Jylla, ka dei ka jingdawa jong ka por kumba ki Longshuwa jong ka Jylla kila iohi jngai.
“Ban don da kawei ka Nongbah ha Ri-lum Garo kan ym iarap tang ban pynsted ia ki kam pynroi ha ka thain Garo hynrei kan kyntiew ruh ia ka khaii ka pateng, ka ban kyntiew ia ka ioh ka kot jong ka thain” ong u Thoseng Chiba Marak, President ka AGHMA ha ka kyrwoh.
Ula ong ba ki Sorkar ha ki snem bala leit noh kila shu iehbein ia ka Ri-lum Garo ha baroh ki liang bad kila set ia ki skhor halor ki jingdawa jong ki paidbah ka Ri-lum Garo ban buh sa kawei ka Nongbah.
“Ki don shibun ki daw halor ka jingdonkam ban buh sa ia ka Nongbah Tlang (Winter Capital) ha Tura. Ka Jylla Meghalaya kam dei satia kaba nyngkong ban don ia artylli ki Nongbah hapoh ka Ri namar ki don bun ki Jylla kiba la don ia artylli ki Nongbah” ong u Marak.
Ka AGHMA kala kyntu ia ki paid ka Ri-lum Garo bad ruh ia ki Kynhun bapher bapher ba kin iasnohkti lang bad ban pynjur ia ka jingdawa halor ka Nongbah Tlang ha Tura.
