Agartala, Naiwieng 21: Ka Agartala Press Club kala phah da ka shithi sha u Myntri Rangbah (CM) ka Tripura u Dr Manik Saha ban dawa na ka bynta ban pyndep noh kloi ia ka jingtohkit bad ban shim ia ki lynti jong ka jingpynshitom pyrshah ia ki briew kiba la shah kynnoh donkti ha kaba iadei bad ka jingshah pyniap jong ki arngut ki nong pathai khubor ka jylla kaba la jia ha ka snem 2017.
Ha ka shithi sha u CM ka jylla, u Secretary ka Agartala Press Club u Pranab Sarkar ula ong ba kam shym la don kano kano ka kaiphot lyngba ka jingtohkit jong ka CBI wat hadien saw snem jong ka jingjia shah pyniap ki arngut ki nong pathai khubor kaba kynthup ia u Sudip Datta Bhowmik bad uSantanu Bhowmik.
“Ha u snem 2017, arngut ki nong pathai khubor ka jylla kila shah pyniap dusmon tang hapoh ki lai bnai.Ka ri baroh kawei kala pynpaw ka jingkyndit kaba khraw ha kaba iadei bad kane ka jingjia shah pyniap.Nalor kata kane ka jingjia kala saphriang ruh ha kiba bun ki ri ka pyrthei.Ha kaba nyngkong kane ka sorkar ba mynta ka la thaw ia ka kynhun SIT na ka bynta ban pynlong ka jingtohkit halor kane ka jingshah pyniap.Hynrei, hadien ka jingiakhih ba tyngeh da ki lad pathai khubor ka jylla, ka sorkar BJP kala aijingmut na ka bynta ban aiti ia ka jingtohkit sha ka CBI.Kumba ju long ka CBI ruh kala shimti ia kane ka jingtohkit.Hynrei kalong kaba sngewsih ba kane ka jingtohkit CBI kam shym la pyni satia ia kata ka jingseisoh,” ong ka shithi.
Nalor kata ula kam ruh ba ka CBI kam pat shym la sdang ruh ban tohkit ha kaba iadei bad ka jingshah pyniap jong u Shantanu Bhowmik.
“Ha kawei pat ka liang, watla la dep ban charge sheet ha kaba iadei bad ka jingshah pyniap jong u Sudip Dutta Bhowmik, hynrei ia ka jingshim bishar kaba khatduh ym pat shym la sdang satia.Kam pat shym la don kano kano ka jingpynbna ia ka rai pynrem pyrshah ia kiba shah kynnoh donkti.Ki nong pathai khubor ka jylla kila pynpaw ka jingsngew kyndit ba wat hadien saw snem jong ka jingjia, pynban kito ki briew kiba donkti ha kane ka kam pyniap kim pat shym la shah rai pynrem.Nga kyrpad jur ia ka sorkar jylla ba kan pyndep noh mardor ia ka jingtohkit bad ban shim ia ki lad jingpynshitom pyrshah ia ki briew kiba donkti,” ong ka kaiphot.
