Nongstoiñ, Nailar 29: Ka FKJGP Langpih Area Unit ka dap da ka jingsngewkhia halor ka jingbym treikam bha jong ki network tower ha ka thaiñ Langpih, kiba la shu pynieng mynta ha Iewnongma bad Langpih.
Ka jingdon kine ki tower network ka la don jingkyrmen shibun ïa ki paidbah ha ka thaiñ Langpih kiba la ïoh ban pyndonkam ia ki mobile phone ha ki jingdonkam jong ki.
Hynrei, ka jingthut khah khah bad jingbym treikam kine ki network, ka la pynsep ei bad duh jingshaniah na ki paidbah ïa kine ki tower network kiba la wan pynieng da ka Airtel Company.
Ka seng ka dawa jur ba ki bor ba dei khmih ïa kine ki network tower, ba kim dei ban shu buh kai khlem da treikam.
Ka jingduh ka dei ïa ki paidbah bad ka jingpynieng tower ka dei tang ka kam ban shu pynbiej kai ïa ki paidbah.
Lada ka ïai long kumne, kine ki tower kiba ieng khlem kam ha Langpih bad Iewnongma, la bha ban rat noh ïa ki, ong u Bah Serbilin Lyngdoh President ka FKJGP Langpih Unit.
