Shillong, Nailar 30 : Arngut ki nongialehkai kriket na ka jylla ba kynthup ia u Dippu Ch Sangma bad u Kishan Lyngdoh ki la shah jied na ka bynta ka North East Zone (NEZ) kaban leit shim bynta ha ka sien kaba nyngkong eh ha ka Duleep Trophy.
Ia katei ka kynhun yn ialam da u Chiang D Shira jong ka Meghalaya kum u Manager.
U Sangma u la ioh ban mihkhmat haduh 45 tylli ki jingialehkai ia ka Meghalaya ha ki lympung ialehkai jong ka BCCI bad u la ioh ruh ban kamai palat spah ron ha ka Ranji Trophy bad ar tylli ki shiteng spah ron ba kynthu kawei ha ka first-class Ranji Trophy bad kaewi pat ha ka 50-over Vijay Hazare Trophy. Nalorkata u la ioh ruh ban khur 40 wiket ha ki ar tylli ki lympung iakhun jong ka T20 Syed Mushtaq Ali Trophy.
Haba phai pat sha u Lyngdoh, utei u rangialehkai ula don bad ka kynhun ialehkai ka Meghalaya dang tang katto katne por hynrei u la paw bha ha ka Syed Mushtaq Ali Trophy ha u snem 2021, da kaba ioh ban kamai haduh 247 ron ha ki san sien iakhun kata da ki lai tylli ki 50 ron kaba long ha ka rukom kamai ron (strike rate) kaba jan kot 143 ron.
Lah ban kdew hangne ba ka Duleep Trophy kadei ka first-class knockout tournament kaba sei pyrthei ia ki kynhun na ki zone bapher bapher bad kane kadei ka sien kaba nyngkong ba ka North East kala shah kynthup lang nalor ba ka Assam bad Tripura ki ngat ha ka East Zone.
Baroh 15 ngut ki nongialehkai kiba shah jied na ka bynta ka NEZ ki dei ki trai jylla suda bad na ka liang ki nongjied ruh ki la rai ban ym jied satia ia ki nongialehkai ba na shabar. Kane ka kynhun kan hap ban aireng pyrshah ia ka West Zone naduh ka 08tarik Nailur.
Kane ka kynhun ka kynthup ia u Techi Neri, Techi Doria (baroh arngut na Arunachal Pradesh), Bishworjit Singh Konthoujam, Rajkumar Rex Singh, L Kishan Singha, Md Al Bashid (baroh na Manipur), Kishan Lyngdoh, Dippu Ch Sangma (baroh na Meghalaya), G Lalbiakvela, Bobby Zothansanga (baroh na Mizoram), Jonathan Rongsen, Khrievitso Kense, Hokaito Zhimomi (baroh na Nagaland), Ashish Thapa bad Ankur Malik (baroh arngut na Sikkim)
