Namar ka jinghiar kyrdan shatrai ha ka PGI
Shillong, Nailur 16 : U Myntri ka Tnad Pule Puthi ma Lahkmen Rymbui hynne ka sngi Thohdieng, ula ong ba ka Sorkar Jylla ka dang wad ia ka lynti ba junom ban pynkiew biang ia ka pule ka dangle ha Jylla hadien ba ka Jylla kala shah pynhiar kyrdan shatrai eh kat kum ka Performance Grading Index (PGI).
“Ka Sorkar ka tip ia ka kyrdan jong ka Jylla ha ka PGI, kaba dei ka jingtynjuh, hynrei, kala shim ia ka kum ka dak ba ka Jylla kan hap ban pynkylla ia kiei kiei baroh bad ban shim ia ka rai ba eh ha kaban pynkhlain ia ka jingshakri jong ka Tnad ka ban iahap bad baroh ki kynhun ba don bynta” ong u ma Lahkmen haba jubab ia ka call attention motice bala wanrah da u MLA ka Mawsynram Bah Himalaya Shangpliang ha Iingdorbar Thaw Ain.
“Nga kwah ban ban jur ba ka Sorkar Jylla kala wadbniah bha ia kane ka kam na baroh ki liang. Nga kyrpad ia baroh ba kin kyrshan ia ka Sorkar Jylla bad ia ka Tnad Pule Puthi ba kan lah ban wanrah ia ka lynti kaba biang eh ban kyntiew ia ka pule ka dangle” ula ong.
U Myntri ula ong ba ka kyrdan jong ka Jylla ha ka PGI ka long kaba rit eh namar kiba bun ki daw bad ka Jylla ka donkam ban leh eiei ha kaban wanrah ia ki lad ki lynti kumno ban pynjanai ia ka pule ka dangle jong ki Khynnah.
“Kam don lypa satia ka lynti kaba shipor ne junom ia kane, ka Tnad Pule Puthi da ka jingkyrshan jong ka Sorkar Jylla kynthup ka Sorkar Pdeng, kan hap ban shim ia ka lynti ban pynbeit ia kiei kiei baroh bad ban sdang da ka jingai ia ki jingtei kiba biang bad ki jingdonkam baroh” ula ong.
Hapoh ka PGI, ki jingtei bad ki jingdonkam ki kynthup ia ki karma klas kiba biang, ICT/Smart Class, Library/ ki jaka pule kot, ki painkhana ba treikam, ka umbam umdih ba shngain, ka bording elektrik, ki vocational labs/workshop, midday meal, integrated science lab, jingsam ei ia ki uniform bad ki kot nalor ka Iingskul kaba biang pura.
Haba pynpaw ba ka Jylla kala lah ban pyni ia ka jingkiew, u Myntri ula ong, ka Jylla ka donkam ban pynleit jingmut ha ka Adjusted Net Enrolment Rate (ANER) ha ki kyrdan Secondary, ka jingpynsah klas ha ki kyrdan elementary bad secondary bad ban shim ia ka sienjam ha kaban ithuh ia ki khynnah bym leit skul shuh nalor kiwei kiwei.
Haba phai sha ka jingdon ki kor digital, u ma Lahkmen ula ong ba ka Tnad Pule Puthi kala pyntreikam ia ka Teachers Information Management System (TIMS) na ka bynta baroh ki nonghikai kiba shakri ha ki skul bapher bapher bad kumjuh ruh ki College kiba don hapoh ka Jylla.
U Myntri u ong, khnang ban pyntreikam ia ki kot digital ha Jylla, ka Jylla kan hap ban pyntreikam ia ka Vidya Samiksha Kendra (VSK) lane ka command and control centre kaba dei ka Learning Management and Tracking System (LMS)
Haba phai pat sha ki jingtei jong ki skul bad ka jingshngain jong ki Khynnah, u Myntri ula ong ba ka Jylla kala shimkhia ia kane bad kala kyrshan ia 208 tylli ki skul da ka song pisa ba kot T. 109.33 klur na ka bynta ka wat ba nyngkong, 111 tylli ki skul ha ka song pisa ba T.100 klur ha ka wat kaba ar bad 1878 tylli ki skul da ka song pisa ba kot T. 86-76 klur jong ka wat kaba lai, ba kin pynbha ia ki jingtei baroh.
