Shillong, Nailar 22 : Ka Myntri Sorkar bad MLA ka East Shillong kong Ampareen Lyngdoh kala iathuh ba ka Sorkar ka dang pynkhreh ia ka plan ban shim ha kaban pynbeit ia ka kam dukan madan ha Laitumkhrah.
Kala pynpaw ruh ia ka jingkyrmen ba ka rai ka Sorkar ban pynkynriah ia ki nongshong dukan madan kan wanrah ia kajuh ka dur jong ka Khyndailad ha ki surok ka Laitumkhrah.
Haba iakren bad ki nongthoh khubor ha ka sngi Thohdieng, ka kong Ampareen kala kular ba ka Sorkar kan leh ia kane ka kam da ka jingphikir bha bad ka thong ka long ban wad ia ki lad ki lynti ki ban ai jingmyntoi ia baroh ki kynhun kiba don bynta.
“Bad ka Sorkar ka donkam ban kynmaw ba ka jingtuklar ka Iingkashari ka don tang shipda maw na ki nongshongshong. Ngin hap ban shimkhia ia kane ka kam da kaba leh phikir bha. Ngin hap peitbniah ia ka jinglong jingman. Nga kyrmen ba ngin sa iohi ia kaei kaba long mynta ha Khyndailad ha ki surok ka Laitumkhrah” pynpaw ka Myntri.
Haba pynpaw ba donkam ban da khein jingkhein bha ha kaba leh eiei ia kane ka kam, ka kong Ampareen kala ong “Ka dei ka kam kaba jyrwit jyrwat bha bad kum ki nongshongshnong ngan ym kynthoh eiei ia ka kam kaba dang lung. Lano ngin pynkynriah iaki, kumno ngin pynkynriah ia ki balei ban gin pynkynriah iaki bad shano ngin pynkynriah iaki, ngi hap ban long kiba iai shah. Kynmaw ba kane kakam ka ktah ia ka jingim ki briew, ngi hap ban husiar bha”.
Kane ka jingkynthoh ka Myntri kala mih hadien ba ka Sorkar Jylla dang shen kala pynbna ia ka rai ban pydnep noh ia ka jingpynkynriah ia ki nongshong dukan madan na Laitumkhrah, Civil Hispital Point bad Them Bijoy haduh Motphran da ki wat ki wat.
