Shillong, K’lyngkot 10 : U Myntri Rangbah ka Jylla Conrad K Sangma ha ka sngi Thohdieng ula ong ba ka Sorkar Jylla ka dang bishar ia ki jingtyrwa ban pynkha ia ki district thymmai hapoh ka Jylla.
Haba jubab ia ka jingkylli halor ka jingdawa ban kyntiew kyrdan ia ka Sohra sha ka District thymmai, u Conrad ula ong b aka Sorkar kala ioh pdiang ia shibun kiba kum kine ki jingdawa na kylleng ki jaka kynthup ia ka Sohra bad ka Dadenggre.
“Hooid, kumta nga ong ngi kwah ban pynjan ia ka jingshakri ka sorkar sha u paidbah hynrei ki don shibun ki jingeh kiba ngi iakynduh bad ngi don ruh ki jingeh haba iadei bad ka jinglong jong ki jaka bad kiwei kiwei, ngi hap ban khmih ia bun kiei kiei” ula ban jur.
Haba pynpaw ba ka jingeh ha ka pisa tyngka ruh ka don, u Myntri Rangbah ula ong ba kam long kaba suk ia u ban shu ai kano kano ka jingkular ha kane ka khep ba mynta.
“Ngi hap ban pynlut shibun bah ka pisa. Kumta, kam dei kaba ngi ong hooid ne ong em ia ka hynrei kine ki kam ki dei ia kaba hap ban shong bishar bha bad ki don shibun ki jaka, shibun ki briew kiba hap ban wanrah lang ha kajuh ka jaka, shibun ki rai kiba hap ban shim bad kumta ngi hap ban bishar bha” ula ong.
Haba kylli la ka Sorkar kan mynjur ban pynkha ia ka district thymmai hashuwa u 2028, u Myntri Rangbah ula ong “Ka dang kloi eh ia nga ban ong eiei ia mynta”.
