Shillong, Nailur 12: U Myntri Rangbah ka Jylla Conrad K Sangma ula pyntip ba ka Sorkar Jylla ka dang ap ia ka jubab na ka Sorkar India halor ka Resolution ban pyntreikam ia ka Inner Line Permit (ILP) ha Jylla.
“Mynta kane ka kam ka don ha ka Ministry of Home Affairs (MHA) bad namar kata, ngi hap ban ap ia kano kano ka jingbthah lane jingmynjur naka” ong u Conrad haba jubab ia ka Zero Hour Notice bala wanrah da u MLA ka Nongpoh Bah Mayralborn Syiem ha ka Iingdorbar hynne ka sngi nyngkong.
U Conrad ula pyntip ruh ba ka Sorkar Jylla kala dep aiti ia ka dorkhas, ba kynthup ia ka ILP kum kawei na ki mat jingdawa, sha u Myntri kam Pohiing Amit Shah, ha ka por ba u wan iuhkjat ha Jylla myn ha ka 23 tarik u Rymphang 2021.
“Ka Jylla Meghalaya ka dang ap ia ka jubab na ka Sorkar India halor kane ka kam” bynrap u Conrad.
U Myntri Rangbah ka Jylla ula ong ba ka Sorkar Meghalaya Democratic Alliance (MDA) kala pyni ia ka jingshimkhia shisha ia kane ka kam da kaba mynjur ia ka Resolution ha ka 19 tarik Nohprah 2019, kaba jia ruh hadien ka jingjur palat ka jingdawa pyntreikam ia ka ILP ha ka Jylla.
U Conrad ula ong ba ia kane ka Resolution la phah sha ka MHA naduh ka 23 tarik Nohprah 2019, ba kan ai ka jingmynjur bad ka Sorkar kala iakren ruh ia ka MHA halor ka kam lyngba ka shithi bala phah ha ka 17 tarik Naiwieng 2020.
U Conrad ula ong ba jingdawa ia ka ILP kala nang jur hadien ka jingpyntreikam ia ka Citizenship Amendment Act (CAA) haba ki kynhun ha kylleng ka Jylla kila pynlong ia ki jingialang ban pynpaw ia ka jingpyrshah halor ka jingbym pyntreikam noh ia ka ILP.
U Myntri Rangbah u pyntip b aka kynhun ki MLA ruh kila dep iakynduh ia u Myntri kam Pohiing ha New Delhi myn ha ka 20 tarik Rymphang 2020 bad ia kane ka kynhun la pyntip ba ka Sorkar India ka dang shong bishar ia ka Resolution bala mynjur da ka Iingdorbar Thaw Ain ka Jylla haba kular ruh ba da lei lei ruh kan ym don ka jingpyrshang ban pyntroin ia ka hok jong ki paid riewlum ka Jylla.
U Myntri Rangbah ka Jylla ula ong ba ha ka jingwan iuhkjat u Amit Shah ha u snem baal lah, hynniew ngut ki dkhot na man ki hynniew tylli ki Sengbhalang, kila iakynduh ia u bad pynsngew ia ka jinglong kongsan ban pyntreikam ia ka ILP ha Jylla haba bynrap ba bun ki Sengbhalang kila dawa ruh ban iakynduh ia u Myntri kam Pohiing hynrei la kular ia ki ba un sa khot sha Delhi ban iakren shuh shuh ia ka kam.
Ha ka 17 tarik Nailar, ka NESO bad kiwei ki kynhun kila pynlong ia ka jingiashong kyllain myngor ha Shillong ban pynpaw ia ka jingpyrshah halor ka jingpyntreikam ia ka CAA bad ban pynsngew ia ka sur jingdawa ban pyntreikam ia ka ILP.
Ha kajuh ka por, u Myntri Rangbah ula ong ba ka jinglong jingman ka suk ka sain ha Jylla mynta ka long kaba jai jai bad ia ki Pulit ka Jylla kila lah ban tehlakam ia kino kino ki jingiakhih ba kin nym pynmih ia ki jingkulmar.
