Guwahati, Nailur12: Ki pulit ka Assam kila kem noh sa ia arngut ki briew halor ka jingsuba donkti bad ka kynhun seng lehnoh Ansarullah Bangla Team (ABT), kaba don ia ka jingiadei bad ka Al-Qaeda ha Indian Sub-continent lane ka AQIS.
U Musadik Hussain bad u Ikramul Islam kila shah kem noh ha ki bor pulit ka Morigaon.U Ikramul uba dei u nongialam niam ne u imam ula shah kem noh na Nagaon. Kine kiba la shah kem kidei kiba la phet rieh mynta lah kumba shi bnai ei ei, ong ka tyllong khubor heh pulit.
La ong ruh ba kine ki dei na ka tnat treikam kaba napoh Morigaon jong ka kynhun ABT bala lamkhmat da u nongialam niam u Mufti Mustafa uba la shah kem noh kham hashwa.
Kham hashwa kawei ka skul Madrassa kala shah pynpra noh hapoh Morigaon district halor ka jingsuba don bynta ha ki kam lehnoh kiba don jingiadei bad ka AQIS.
Haduh mynta kila don sawtylli ki skul Madrassa kiba la shah pynjulor noh na Assam naduh shi bnai mynta namar ka jingshah kynnoh donkti halor ka jingdonkti ha ki kam lehnoh nalor ki jingpyrshang ban thep ia ki kynhun kieng atiar jihadi ha ka jylla.
Ha u bnai ba la dep, u Myntri Rangbah (CM) ka Assam, u Himanta Biswa Sarma ula ong ba ka Assam kala kylla long ka ktem na ka bynta ki jaka treikam jong ki lehnoh jihadi. Nalor kata ula pynbna ruh ba ki nongialam niam hapoh ki mosque bad ki madrassa hapoh Assam ki donkam ban rejistar ia lade ha ka portal jong ka sorakr jylla lada ki wan na shabar ka jylla.
Naduh bnai Iaiong ba la dep, ki bor pulit ka Assam kila kem noh haduh kumba 40 ngut ki briew bad long kiba husiar khamtam ha kito ki thain ba bun ki rit paid ha ki bynta shathie bad ki bynta pdeng ka Assam namar ka jingdon ki kynhun lehnoh kiba la ioh jingkyrshan na ka AQIS.Kiba bun na kine ki dei ki imam jong ki Masjid lane ki nonghikai ha ki skul Madrassa ba shimet.
