Shilong, Naiwieng 11: Ka Seng Khasi Kmie hynne ka sngi kala pynbna ban pynlong ia ka tamasa kaba ar sngi bala ai kyrteng ka ‘Na Thymmei’ ha ka 19 bad ka 20 tarik Naiwieng 2022 kum shi bynta ban pyntip sha ka pyrthei ba ka jaidbynriew Hynniewtrep Hynniewskum ka long kaba riewspah ha ka kolshor.
Haba kren sha ki lad pathai khubor u Cultural Secretary ka Seng Khasi Kmie Mawkhar Shillong u bah Hamar Sing Kharpa u la iathuh ba ha kane ka Tamasa ban sa pynlong ha lympung shad suk mynsiem kaba don ha Jaiaw, Shillong, kin sa don ki jingshad bad ki jingrwai sur tynrai bad kumjuh ruh ka jingiakop pyni riam tynrai ba la ai kyrteng Nai Khatsaw Synnia bad ka Lukhimai bad kynthup ruh ka jingrwai Kynud Iawbei na ka shnong Kongthong.
U bah bah Hamar ula ong ba kawei na ki bynta kiba kongsan tam ha kane ka tamasa kan dei ka jingpyni ia kawei ka phlim lyngkot kaba la ai kyrteng ‘Ka Thymmei, ka Tynre, ka Tyllong’.
U la iathuh ba ha kane ka Tamasa ba ar sngi, kin don 14 tylli ki kynhun ki ban sa iashim bynta kiba kynthup ia ka kynhun na ka shnong Nongtalang, Jowai, Sohbar, Mylliem bad kiwei kiwei de.
“Ha kine ki ar sngi, kan don ka jingshad bad sur jingrwai tynrai bad kan long ruh ka jingiakop pyni riam tynrai bad ka jingiatai bnai halor halor ka jingrwai Iawbei napoh ka shnong Kongthong” la ong u bah Hamar.
U bah Hamar u la ong ba ha kane ka Tamasa ym donkam ban siew bai rung kum shi bynta ban khring iaki paidbah ban wan sakhi iaka jingriewspah ka Lariti jong ka jaidbynriew Hynniewtrep Hynniewskum.
