Shillong, Rymphang 01: Kum ka sienjam ban leit pynshai ia ki paidbah halor ka jingdonkam ban jied nongmihkhmat kiba skhem nongrim, ka seng Hynniewtrep Youth Council (HYC) hynne ka sngi Balang, kala pynbna ban pynlong daka ‘Rai Eh Daw Campaign’ naduh ka 6 tarik mynta u bnai ha kylleng ka jylla Meghalaya.
Haba kren sha ki lad pathai khubor u president ka HYC Roberjune Kharjahrin ula ong ba kane ka jingsdang iaka ‘Rai Eh Daw Campaign’ kadei naka bynta ban pynnsngethuh paidbah halor ka jingdonkam ban jied iaki kyrtong kiba don jingthmu shisha ban long ki nongthaw ain, ki ban thaw ain lane polisi naka bynta ka bha ka miat ki paidbah bad ka jylla baroh kawei.
U bah Robert ula ong ba ki paidbah kidei ban sngewthuh shai ba ka elekshon kam dei ka tamasa shisien san snem ha kaba kin pan pisa naki kyrtong hynrei ki paidbah kidei ban sngewthuh ba ka elekshon kadei ka iktiar ha kaba kin lah ban jied iala u nongmihkhmat u ban trei naka bynta ka bha ka miat jong baroh khlem da noh shilliang.
“Kane ka ‘Rai Eh Daw Campaign’ ka ban sdang naduh 6 tarik mynta u bnai na Motphran kadei ban jingpynshai paidbah bad ban pynsngewthuh sha ki nongshong shnong ka jylla ba kumno ngin jied ia ki nongmihkhmat kiba tbit bad kiba skhem nongrim ban phah sha ka ïng dorbar thawaiñ ba kin iasaid naka bynta ka bha ka miat baroh lang” ong u bah Robert.
U bah Robert ula ong ba ka jingthmu jong ka “Rai Eh daw Campaign” ka long ban lah wanrah ia ka synshar khadar kaba khuid bad ban ioh ia ki nongmihkhmat kiba lah ban pynurlong ia ki mat jingdawa ka Jaidbynriew kynthup ka ILP, ka jingpynrung ia ka ktien Khasi ha ka khyrnit ka ba phra, ka jingdawa weng ia ki ba sah ha Them Iew Mawlong, ka jingpynbeit ia u pud u sam bad kiwei kiwei de.
