Guwahati, Jylliew 22:Ka Riniki Bhuyan Sarma ka ba dei ka kurim jong u Myntri Rangbah (CM) ka Assam, u Himanta Biswa Sarma ka la ujor da ka mukotduma pynjah burom ka ba 100 klur pyrshah ia u Symbud Myntri Rangbah (Dy. CM) ka Delhi u Manish Sisodia ha ka ba iadei bad ki jingkynnoh bam sap lyngba ka jingthied ia ki tiar PPE hapoh Assam.
Ia kane ka mat la khmih lynti ban wanrah hapoh ka iingbishar Gauhati high court ha Assam mynta ka sngi.
Kham hashwa, u Dy. CM ka Delhi u Manish Sisodia u la kynnoh ia u CM ka Assam u Himanta Biswa Sarma halor ka jingdonkti ha ka kam bam sap lyngba ka jingai kontrak ha ka ba iadei bad ka jingthied ia ki tiar PPE.
U Sisodia u la pynpaw ha ka jingialang bad ki lad pathai khubor ha New Delhi ha ka 4 tarik mynta u bnai da ka ba ong katba ka sorkar Assam ka la thied ia ki tiar PPE ha ka dor ka ba T.600 kawei na kiwei pat ki kompeni, hynrei u Sarma u la phah kyrkieh na ka bynta ban pynioh lyngba ki kompeni ki ba dei ki paralok nongkhaii jong ka kurim bad u khun jong u ha ka dor T.990 kawei, kata da ka ba shim kabu halor ka jingdonkam ba kyrkieh namar ka jinglong jingman na ka jingsaphriang jong ka jingpang Covid-19.
