Ba kuman ka Sorkar ia ki jingdawa halor ka IIPH
Shillong, Jylliew 26: Ki Doktor ka Jylla kiba don hapoh ka lama jong ka Meghalaya Medical Services Association (MMSA) ki la rai ban pynlong da ka jingsangeh treikam ba 24 kynta naduh ka sngi ba-ar ban wan kum ka dak ban pyrshah jur ia ka jingbym lah ka Sorkar ban leh eiei pyrshah ia ki bor pyniaid ka Indian Institute of Public Health (IIPH).
Ka khubor ba iajan bad ka MMSA ka pyntip ba kane ka jingiakhih kan dei jong ka kylla ba nyngkong bad lada ka Sorkar kam leh eiei noh,ka jingiakhih ka lah ban kham jur shakhmat bad kan sa ktah jur ia ki lad ai jingsumar hapoh ka Jylla. Ka jingiakhih kan sdang naduh ka por 9 baje mynstep jong ka sngi Ba-ar.
Ha ka 24 tarik Jylliew, ka MMSA kala byrngem ban shim ia ki lynti jong ki jingiakhih, ka rai kaba la shim ha ka jingialang ba kyrkieh jong ka State Executive Committee (SEC) ka MMSA.
“Ka SEC ka MMSA…kala rai ba namar ka Sorkar kam shym la leh eiei ia ki jingdawa jong ka MMSA, kam don lynti shuh da kumwei hynrei ban shim ia ki lad jingiakhih ia kaban sa pyntip” ong u General Secretary ka MMSA Dr P Pohsnem ha ka shithi bala phah sha u Secretary ba dei khmih ia ka Tnad ka Koit ka Khiah.
Ha ka shithi ba phah ha ka 1 tarik Jylliew sha u Myntri ka Koit ka Khiah James P.K Sangma, ka MMSA kala dawa ia ka Sorkar Jylla ban thung ia ka jingtohkit bad ban ai ka jingpynsaja ia u Registrar bad Director ka Indian Institute of Public Health (IIPH) halor ka jingkynnoh lamwir ia u Director of Health Services (MI) Dr Aman War ha ki lad pathai khubor.
Ka Association kala pynpaw ruh ia ka jingkyndit halor ka rai jong u Principal Secretary ka Tnad ka Koit ka Khiah u Sampath Kumar, uba la iashah ia ka IIPH ha ka jaka ban sngap ia kaei kaba u DHS(MI) u don ban iathuh halor ka jingjia kaba jia ha ka 27 tarik ha Campus barim ka NIFT kaba don ha Pastuer Hills, Lawmali.
U President ka MMSA Dr Y Phira ha ka shithi ula ong “Ngi la rai ban kyntu hok ia phi ba phin mynjur ha ka ban thung ia ka jingtohkit halor ki kam jong u Registrar bad ka Director jong ka IIPH, Shillong Campus namar ka jingpynthohbria ia u DHS(MI) ha ki lad pathai khubor, uba la tuklar ia ka kam jong ka IIPH kat kum ka iktiar bad ka kamram bala pynkupbor ia u kum u Ophisar”.
Ka MMSA kala dawa ruh ba dei ban phah mih noh ia ka IIPH Shillong na ka Ophis ba ka pyndonkam shipor naka Ophis bala khapngiah jong ka Deputy Director Malaria.
Kat kum ka jingong jong ka, ka IIPH Shillong Campus kala dei ban don la ka jong ka Ophis bad ka jingtei mynta namar ia ka MoU ban wanrah ia ka lah iasoi hapdeng ka Sorkar Jylla bad ka Public Health Foundation of India (PHFI) naduh u snem 2008.
Ka MMSA ha kane ka shithi kala pynrem ruh ia ka rukom pynwandur jong u Registrar ka IIPH ha ki lad pathai khubor halor ka jingleit jong u DHS(MI) sha ka Campus barim ka NIFT myn ha ka 27 tarik Jymmang bad ruh u Principal Secretary ka Tnad ka Koit ka Khiah.
Ka MMSA kala ong ba u DHS(MI) ula shakri hok la 33 snem ha ki jaka nongkyndong ne jaka sor jong ka Jylla ha ki kyrdan bapher bapher tad haduh ba un da poi sha ka kyrdan DHS (MI) khlem kano kano ka jingthohbria bad u dei ruh uba kit khia bha ia ka bha ka miat jong ki doktor bad jong ki paidbah.
Ka shithi ka ong baka MMSA ka tip baka IIPH Shillong Campus ka dei kaba la wanrah ban pynkhlain ia ki lad ai jingsumar ha ka Jylla bad ha ka thain Shatei Lam Mihngi haba bynrap “Hynrei ka jingleh jong u Registrar bad ka Director ka IIPH, ban pynthohbria ia u DHS(MI) kata ruh ha ki lad pathai khubor, kala ktah ia ka burom ka ijot jong ki Dkhot ka Meghalaya Health Service (ki doktor ka Jylla) bad kan nang pynhiar ia ki lad ai jingsumar”.
Ka MMSA kala kyntu ruh iaka Sorkar Jylla ba kan shong bishar biang ia ka Memorandum of Understanding kaba la iasoi hapdeng ka Sorkar Jylla bad ka PHFI.
Ha kajuh ka por, ka MMSA kala pynpaw ia ka jingkyndit bad jinglyngngoh ba kumno u Principal Secretary ka Tnad ka Koit ka Khiah ka Jylla ula iashah ia ka IIPH Shillong kaba dei ka Institution shimet ha ka jaka ban iada ia u DHS(MI) uba dei peit ia baroh ki jaka ai jingsumar ha Jylla khamtam eh khlem da ailad ia une u Doktor ba un batai ia kaei kaba jia, khlem da iakren ia ka jingkren tohmet bad niew bein jong u Registrar ia I Project Director bad Deputy Director ka Meghalaya AIDS Control Society (MACS).
“Kane kala pynduh mynsiem bad pynjem daw ia baroh ki Doktor bad ka ban sa ktah lashai lashisngi ia ka jingiaid beit iaid ryntih ka rukom ai jingsumar hapoh ka Jylla” ong ka MMSA.
