Nongpoh, Naiwieng 19: Ka Khasi Students Union (KSU)-North Khasi Hills hynne ka sngi saitjain, kala aiti ia ka Iing ba la pynshna da ka Seng, sha kawei ka Longiing baduk kaba shem lanot bad ba im jynjar.
Kane ka longiing kadei jong I Kong Silima Lymphuid iba ri haduh 4 ngut ki Khun khlem u Kpa, uba la khlad noh ha ki snem bala leit noh. Kane ka Longiing ka dei kaba shong ba sah ha shnong Pahamsyiem, Nongpoh.
Ka KSU-North Khasi Hills kala pynshna syndon da ka Iingmaw ia kane ka Longiing na ka jingianoh synniang hapdeng ki para dkhot ka seng ban pynmih pisa. Ym tang katta, ka Seng kala pynbit pynbiang ruh ia baroh ki jingdonkam ha kane ka Iing shuwa ban aiti sha i Kong Silima Lymphuid.
Ka KSU-NKH hapoh ka jingialam u President samla Ferdinald Kharkamni, kala shim ia kane ka sienjam kum shibynta ban pynsah jingkynmaw ia ka jingrakhe ia u mawmer ba 25 snem jong ka KSU-NKH ha ka jingshakri ia ka dong ka thain bad ka Ri bad ka Jaidbynriew.
Ia kane ka sngi ba khraw jong ka KSU-NKH la wan ban sakhi da ka jingiadonlang ki Nongialam ba hakhmat ka KSU Sengkmie ba kynthup ia u President samla Lambokstar Marngar, Vice President samla Biangbor L Paliar, u Rangbah Shnong ka Pahamsyiem Bah Wanphrang Sumer bad kiwei kiwei.
“Nga dap da ka jingsngewkmen kaba khraw ba kum ka Seng kala lah ban pyniar ia ka kti jingiarap ba kum kane-kata da kaba pynshna ia ka iing ba paka sha ka Longiing kaba dei hok ban ioh ia kane ka synniang” ong u samla Lambokstar haba kren ha ka jingialang ba lyngkot.
Une u Nongialam ba hakhlieh duh ka KSU ula ong ba watla ka Seng ka dang don hapdeng kiba bun ki raieh raidem hynrei ki Nongialam bad ki Nongkitkam khlem da kynran dien, kila pyni ia ka jingkylluid mynsiem ban pynmih ia ka bai lut bai sep ban pyntrei ia kane ka Iing.
Ula ong ba kane ka dei ka matti kaba khraw eh jong ka KSU-NKH ban pynsah jingkynmaw ia ka jingrakhe dap 25 snem ka jingshakri jong ka Seng ha North Khasi Hills kaba la sdang naduh u snem 1997.
“Ka seng kan nang ïai bteng ban tynrong ïa kum kine ki jingkyrshan ïa kito kiba mad jingjynjar ha ka jingim ka jong ki na kawei ka por sha kawei pat, namar ka jingriew spah jong ka mynsiem kan wanrah ia ka jingkyrkhu ba na sha lyndet”, ong u samla Lambokstar.
