Shillong, Naiwieng 19 : Ka National People’s Party (NPP) kaba ialam ia ka Sorkar MDA ha Jylla, kan pynieng kyrtong ym duna ia ka 54 tylli ki Constituency na Ri-lum Garo bad Khasi Jaintia Hills ha ka elekshon MLA-2023. Ia kane la pyntip da u President ka NPP Meghalaya uba dei ruh u MP ba marwei ka Jylla sha Rajya Sabha Dr WR Kharlukhi hynne ka sngi saitjain.
U Dr Kharlukhi ula ong ruh ba ka Nongrim jong ka NPP pyrshah ia ka CAA kam pat kylla satia bad ka party kan iai bteng ban pyntreikam ia ka CAA hapoh ka Jylla.
Ula ong ruh ba ka nongrim ba ka NPP ka ieng ka long ban pyniatylli ia ka thain Shatei Lam Mihngi-Kawei ka Sur, Kawei ka Thain NE. “Kaei kaba ngi donkam ka long ka sur kaba khlain jong ki paidbah ka thain ban iohsngew ha Delhi….Ta ka daw la pynkha ia ka NPP ha kane ka nongrim. Ngi donkam ban iaishah, ka la shimpor ia ngi 20 snem ban wan ha ka bor ha Meghalaya, ngan sa iohi ia ka sngi ba kane kan sa jia ha Iingdorbar Parliament ha Delhi” ula ong.
U Dr Kharlukhi ula pyntip ba ka NPP kan pynieng kyrtong ym duna ia ka 54 tylli ki constituency kynthup na Ri-lum Garo bad Ri-lum Khasi Jaintia ha ka elekshon MLA ban wan bad ula pynpaw ruh ia ka jingsngew skhem ba ka NPP kan ioh ia ka jingjop obsolute majority.
“Ngin iakhun na 54 tylli ki constituency, ka dei ban long kaba suk ia ngi ban ioh ia ka jingbun paid” ula ong hynrei ula kloi ban bynrap “Ngi la buhthong ban ioh ia ka absolute majority hynrei ai ba kan da mih ka result, ngin sa peit ia kaei kaba jia”.
Haba kynthoh ia ka jingkren u Nongialam ka AITC Dr Mukul Sangma ba ka NPP kan ym ioh palat ia ka 6 seat na Ri-lum Garo, u Dr Kharlukhi ula jubab da kaba ong ba u kyrmen ba u LP u tip kumno ban khein jingkhein ialade lem kumta u lah ban shah rem naka constituency ba u mihkhmat ruh.
