Shillong, Naitung 16: Ka Sanathan Dharmasabha Harishava kala pynlong ia ka Cricket Tournament Day/Night jong ki rang ialehkai bala 45 snem shajrong shuwa ka jinglehniam Durga Puja ba 125.
Ia kane ka lympung ialehkai la plie da u Kamonamoy Deb, Shri Shekar Das bad Shri Dipankar Deb.
Haduh 10 tylli ki kynhun ialehkai kila wan iashim bynta ha kane ka lympung kiba kynthup ia ka Matri Mandir, Harishava, Laban Shiv Mandir, Hindu Mission, Geetali, Nabajagran, R. R. Colony Ganesh Mandir, R R Colony Sarodiyo Utsav Samity, Jail Road Puja Committee bad Lumparing.
Ka jingialehkai ba nyngkong ka dei kaba la ialeh hapdeng ka Harishava pyrshah ia ka Geetali bad ha kane ka jingiakhun ka Geetali kala ioh ia ka jingjop. Kane ka jingiakhun kala sdang naduh ka por 5.30 baje janmiet ha Harishava Mandap, Laban.
