Shillong, Naitung 16 : Ka Shillong Commerce lyngba ka Khasi Department ka la pynlong ïa ka jingrakhe kynmaw burom ïa ka lyngkhuh sngi ïap ba 187 snem jong u Tirot Sing Syiem, Syiem ka Hima Nongkhlaw ha kane ka sngi Saitjaiñ.
La pynshongkun ia katei ka jingrakhe kynmaw burom da ka jingdonlang naduh ka Principal, Dr. Mrs S. Sen, u Rev Dr O.L.Snaitang kum u riew shemphang, ki nonghikai bad ki samla pule.
Ha shwa kane ka la don ruh ka jingbatai lyngkot shaphang ka jingim bad ka jingiaid lynti jong u Tirot Sing da ka Principal. Ha kajuh ka por, u Rev Snaitang u la iathuh bniah shaphang ka jinglen lade jong u Tirot Sing na ka bynta ka Ri bad ka jaidbynriew bad tad haduh ba un da khlad noh na kane ka pyrthei.
Nalorkata, u la batai ruh ba u Tirot Sing u la kiew ïa ka khet syiem naduh ka por ba u dang kham khynnah ha ka rta, pynban kum u syiem u la lah ban pynïaid bad synshar bha ïa la ka Hima da ka ba u tip bha ïa u pud u sam, ïa la ki briew bad ïa ki aiñ ha ka synshar ka khadar.
