Shillong, Naitung 16: Ki Nongtrei ka GVK-EMRI hynne ka sngi saitjain, kila rai ban sangeh treikam ha ka 18 tarik Naitung kum ka dak ban pyrshah ia ka jingbym lah ka Sorkar Jylla ban pynkut noh ia ka Contract bad ka GVK-EMRI.
Haba pynbna ia kane ka rai, ka President ka Meghalaya EMRI Worker’s Union (MEMRIWU) Microlina Syiemlieh kala iathuh ba kane ka jingsangeh treikam kan sdang treikam naduh ka por 4 baje janmiet jong ka sngi nyngkong.
“Wat hapdeng ka jingkut ka jingaipor ba 72 kynta, u Myntri ka Koit ka Khiah ne ka Tnad ka Koit ka Khiah kim shym la pyni dak ia ka jingkwah ban khot iakren ia ki nongialam ka Union halor kane ka kam” kala ong.
Ka pyntip baka kynhun jong ka Union kala iakynduh ia u Joint Managing Director ka National Health Mission (NHM) uba la kular ban sa khot shong jingialang biang bad u Managing Director ka NHM ha ka sngi nyngkong.
Ka Kong Macroline kala ong ba watla ka Union kala mynjur ban iakynduh ia ka MD jong ka NHM, ka jingshisha hi ka long baka NHM kam dei ka bor ba lah ban pynurlong ia ka jingdawa jong ka Union. “Ha ki por bala leit noh, ngi la iakynduh ia u MD ka NHM hynrei ym shym la kular eiei ruh ia ngi” kala bynrap.
Haba pynpaw ia kajuh ka sur, u Nongaiktien ka Union Bah Roypar Kharraswai ula ong baka GVK-EMRI kala pulom ha ka jingtreikam ha baroh ki liang haba iadei bad ka jingai jingshakri ba biang eh ia ki paidbah ka Jylla bad namar kata, ka jingdawa ban pynkut noh mardor ia kane ka contract kala mih.
U Bah Roypar ula ong ba watla ka Sorkar Jylla kala bei tyngka haduh T. 12 klur, hynrei ka GVK-EMRI naduh u snem 2018 kala ialeh ban khate ia ki jingpynlut pynsep kaba la ktah ia ka jingtreikam ba iaid beit iaid ryntih jong ka Emergency Service ha ka Jylla.
Kat kum ka jingong jong u, ka Sorkar Jylla ka ju bei haduh T.12 klur manla u bnai lem bad ka song pisa ba T. 5000 ia kawei ka ambulance ba donkam ia 5 ngut ki briew, ba kin ai ia ka jingshakri ia ki paidbah, hynrei la shu tynrong kam ia ki nongtrei ha ka jingsiew ba duna bha.
