Shillong, Nohprah 16: Ka long ka sngi sdang kaba la pynkhih win bha ia ka kynhun ialehkai jong ka Meghalaya ha ka jingialehkai ba sdang pyrshah ia ka Mizoram ha ka lympung ialehkai jong ka U-19 men’s Cooch Behar Trophy 2025-26, kaba la sdang ha Anand , Gujarat mynta ka sngi.
Hynrei shwa ba kiei kiei kiba kham sniew kin wan jia wan hap ha kane ka kynhun, u Rudra Singh Rathor (55 na ki 88 bol) bad ki rang ialehkai ba kham shadien , ki la pyllait im ia kynhun ba kan lah ban kamai palat ia ka ar spah ron.
Ka khana jong ka jingiakhun ka long ba ka Meghalaya kaba la jop ia ka jingkynting pisa (toss) ka la kam trai ba kan wan ban tied nyngkong, kaba hangne ka la lap ba hap 7 wiket bad kamai tang 132 ron, kaba ha shwa ba kiei kiei baroh kin sdang kylla khongpong khongdeh lut, u Rudra u la lah ban pyllait im ia ka kynhun bad bynrap lang sa u Mannan Surana ba la kamai 31 ron bad u Dipayan Nandi 37, Mewankitbok Kharpuri (21 ron) Grish Raj Ray (16 ron na ki 5 tylli ki bol) kaba pynlong ia ka Meghalaya ba kan lah ba kan kamai 219 ron.
Haba la wan ban sdang pat ia la ka jong ka pali ban tied, ka Mizoram ka la lah ba kan kamai 129 ron hadien ba ka la hap noh 5 wiket.
Kane ka dei ka jingiakhun ba kongsan tam bha ia ka Meghalaya ba kan khur ia ka jingjop ka jong ka.
Hadien ba la wan pat ban bol, u Namewanki Pakyntein (3/25 na ki 9 overs) u la lah ban khur lai na ki saw tylli ki wiket ba ka hap jong ka Mizoram, bud pat a u Mewankitbok (1/27), Gaurav Narleng (1/27) ki la pyndep hok ia la ka jong ka kamram ka jong ki bad ban buh ia ka kynhun hapdeng ka thong ban iakhun.
U Malsawmmuanzela u la lam khmat ia la ka kynhun ka Mizoram ban kamai 32 ron ba la wan na ki 26 tylli ki bol.
Kumta kaba sah na kane ka jingiakhun ka long ba ki bowler ka Meghalaya kin bteng ia ka sur ialehkai ba bha ka jong ki ban lah ban pynhap kham sted ia ki wiket ba sah ka Mizoram.
