Shillong, Naitung 06 : U Myntri Rangbah ka Jylla Conrad K Sangma hynne ka sngi Palei ula ong ba kam long kaba suk ia ki bor Sorkar ba kin lah khang pura ia ka jingtih dewiong beain bad jingkhaii ia u dewiong hynrei ka jingpyrshang kala iaid shaid shaid.
Haba iakren bad ki nongthoh khubor, u Conrad ula ong ba kila don ki ain bapher bapher na ka bynta ki briew kiba trei ia ki kam beain ha ka kam tih dewiong.
“Ki bor Sorkar kila leh ia kaba dei ban leh bad kila register da ki hajar tylli ki case bad da ki hajar ngut ki briew kila shah kem bad shah chargesheet. Kat kaba lah, ngi la pyrshang ban leh eiei ha kaban pynthikna ban gin lah pynduna ia kane ka kam ba beain” ong u Conrad.
U Conrad ula ong “Kaba ar, phi hap ruh ban sngewthuh ia ka jingshisha halor kane ka kam…ba ki briew kila leh ia katei ka rukom tih dewiong naduh ki 200 snem mynshuwa bad ka kamai kajih jong ki ruh ka iaid na kane ka kam”.
“Katba kam pat don kawei pat ka lad kamai kajih, ki briew kin dang iai bteng ban leh ia kine ki kam. Kam long kaba suk ia ki bor Sorkar ban shu khang syndon ia kiei kiei baroh hynrei ka jingpyrshang kala don” ula bynrap.
Hynrei u Conrad ula ong “ Ngi kmen ban iohi ba mynta ka jingtih dewiong kat kum ka ain kan sa sdang noh bad ngin sa ioh ia ka jingtih dewiong da ka jingstad saian bad ngin sa ioh ruh ia kiwei ki lad kamai kajih la ka dei ha ka kam rep kam riang lane kam jngohkai bad kane ka dei ka lynti kaba ngin sa iohi ha kaban lah pynkut noh ia kine ki kam beain”.
“Mynta saw ngut ki briew kila ioh jingbit bad katba ngi dang ia kren, ka jingpynkhreh ia ki jingdonkam baroh kila nang iaid bad nga kyrmen ba hapoh kine ki khyndiat bnai ban wan, ngin sa iohi katto katne ki par kila sdang da ka jingtih kat kum ka juk saian” ula bynrap.
Haba kylli halor ka drone technology, u Conrad ula ong “ Ka kham kyllain kane ka kam namar ka jaka ka long kaba heh bad hooid ngi don ia ki drone hynrei ngi donkam bun tylli ki drone bad ngi la pyndonkam teng ruh ia ki drone technology ban map ia ka jingpyllang ia u dewiong la ki dei kiba beain ne ki bym beain bad ia kane la dep ban aiti sha ka Iingkasahri”.
U Conrad ula ong “Kane ka dei ka kam kaba hap pynbteng bad namar kata ngin donkam ban buh haduh 100 tylli ki drone bad kiba treikam manla ka sngi ban map ia ki jaka. Kane ka dei ka lynti kaba ngi lah ban shong bishar bad khmih bniah hynrei kumba nga ong, ki don ruh ki bynta ba ktah ia ka pla tyngka bad ka bor khmih namar ka jingdonkam ia ki briew”.
